Almaniyada avtomobil sənayesində iş ixtisarlarına qarşı etirazlar başlayıb
Almaniyanın ən böyük sənaye həmkarlar ittifaqı IG Metall ölkənin avtomobil sektorunda iş yerlərinin ixtisarı və xərclərin azaldılması tədbirlərinə qarşı ümummilli etirazlara başlayıb.
Crossmedia.az xəbər verir ki, bu barədə Almaniyanın ARD telekanalı məlumat yayıb.
Həmkarlar ittifaqının çağırışı ilə ölkənin bütün federal torpaqlarında avtomobil istehsalçıları və təchizatçı şirkətlərin əməkdaşlarının iştirakı ilə aksiyalar keçirilir. Wolfsburg, Zwickau və Ştutqart kimi əsas avtomobil sənayesi mərkəzlərində 200-dən çox tədbirin, o cümlədən iş yerində toplantılar, yürüşlər və mitinqlərin keçirilməsi planlaşdırılıb.
IG Metall aksiyalarda 100 mindən çox insanın iştirak edəcəyini gözləyir. Təşkilatın sədri Kristiane Benner avtomobil sənayesində çalışanların böhranın əsas yükünü daşımağa məcbur edildiyini bildirib və bu vəziyyətin dayandırılmasını tələb edib.
Həmkarlar ittifaqı qarşıdakı əməkhaqqı danışıqları ərəfəsində Almaniyadakı istehsal müəssisələrinə daha çox investisiya yatırılmasını və 35 saatlıq iş həftəsinin qorunmasını tələb edir. Təşkilat həmçinin hökuməti elektrik enerjisinin qiymətlərini azaltmağa və bürokratik maneələri aradan qaldırmağa çağırıb.
Almaniyanın avtomobil sənayesi Çin şirkətlərinin artan rəqabəti, istehsal güclərindən tam istifadə olunmaması və elektrikli avtomobillərə keçidin yüksək xərcləri ilə üzləşir. Bir sıra istehsalçı və təchizatçı şirkətlər xərcləri azaltmaq üçün yenidən strukturlaşdırma proqramları elan edib ki, bu da genişmiqyaslı iş itkiləri və zavodların bağlanması ilə bağlı narahatlıqları artırıb.
01:42 22.09.2026
Oxunuş sayı: 45
