Xarici xəbərlər
Danimarka: Qrelandiyanın təhlükəsizliyini NATO təmin edəcək
Danimarkanın xarici işlər naziri Lars Lökke Rasmussen ABŞ ilə Qrenlandiyanın təhlükəsizliyi ilə bağlı əldə olunan razılaşma çərçivəsində Arktika regionunda təhlükəsizliyin əsasən NATO tərəfindən təmin ediləcəyini bildirib.
Crossmedia.az xarici KİV-ə istinadən xəbər verir.
Rasmussen BMT Baş Assambleyasının 81-ci sessiyasında iştirak etmək üçün getdiyi Nyu-Yorkda Danimarka mediasına açıqlamasında ABŞ ilə Qrenlandiyada “davamlı təhlükəsizlik nəzarəti” çərçivəsində əldə olunan razılaşmanı şərh edib.
Danimarkanın ABŞ ilə əldə olunan razılaşmadan məmnun olduğunu vurğulayan Rasmussen qeyd edib ki, ABŞ Prezidenti Donald Trampın daha əvvəl Qrenlandiya ilə bağlı açıqlamaları adada narahatlıq yaradıb. Nazir razılaşmanın Qrenlandiya sakinlərinin narahatlığını aradan qaldıracağına ümid etdiyini bildirib.
Rasmussenin sözlərinə görə, razılaşma Arktikada təhlükəsizlik məsuliyyətinin yalnız Danimarka və ya ABŞ-ın üzərinə düşmədiyi bir çərçivə nəzərdə tutur.
“Arktika regionu ilə əsasən NATO məşğul olacaq”, – deyə Danimarkanın xarici işlər naziri bildirib.
Danimarkalı nazir razılaşmanın məzmunu ilə bağlı əlavə detallar açıqlamaq istəmədiyini də qeyd edib.
ABŞ Prezidenti Donald Tramp sentyabrın 18-də sosial media hesabında paylaşım edərək Qrenlandiya məsələsi ilə bağlı Danimarka ilə razılaşma əldə etdiklərini açıqlamışdı.
Danimarka Krallığının tərkibində olan və təxminən 56 min əhalisi bulunan muxtar ərazi Qrenlandiya son dövrlərdə Trampın adanın ABŞ-ın nəzarətinə keçməsinin zəruri olduğu barədə açıqlamaları səbəbindən Vaşinqton, Kopenhagen və Brüssel arasında gərginliyin əsas mövzularından birinə çevrilib.
16:24 21.09.2026
Oxunuş sayı: 57
