Snapchat yeniyetmələr üçün vaxt limiti TƏTBİQ EDƏ BİLƏR
Snapchat yeniyetmələrin platformadan istifadə müddətinə vaxt məhdudiyyəti qoymağa hazır olduğunu açıqlayıb.
Crossmedia.az xəbər verir ki, BBC bu barədə məlumat yayıb.
Snapchat-in sahibi olan Snap şirkətinin baş icraçı direktoru Evan Spiegel bildirib ki, yeniyetmələrin tətbiqdə keçirə biləcəyi vaxta limit qoyulması sosial media sektoru üçün mühüm addım ola bilər.
Spiegel bu məsələnin şirkət daxilində müzakirə edildiyini, lakin bununla bağlı konkret vaxt çərçivəsinin müəyyənləşdirilmədiyini deyib.
Onun açıqlaması Meta şirkətinin digər sosial media platformalarını da yeniyetmələr üçün oxşar məhdudiyyətlər tətbiq etməyə çağırmasından sonra səslənib.
Avqust ayında ABŞ ştatları ilə əldə olunan çoxmilyardlıq razılaşma çərçivəsində Meta 12,7 milyard dollar ödəməyə və öz platformalarında yeniyetmələr üçün standart olaraq gündəlik iki saatlıq istifadə limiti tətbiq etməyə razılaşıb. Şirkət həmçinin məktəb saatlarında bildirişləri səssizə almağı və gecə saatlarında giriş imkanlarını məhdudlaşdırmağı öhdəsinə götürüb.
Meta bildirib ki, YouTube və TikTok da oxşar tədbirləri tətbiq edərsə, daha sərt vaxt məhdudiyyətləri tətbiq edəcək və əlavə olaraq 5,3 milyard dollar ödəyəcək. Şirkət razılaşma çərçivəsində hər hansı qanun pozuntusunu qəbul etməyib.
Spiegel bildirib ki, Snapchat-də mövcud olan Family Center funksiyası valideynlərə yeniyetmələrin platformadan istifadəsinin müəyyən aspektlərini izləmək imkanı verir.
“Biz problemin həllinin bir hissəsi olmaq üçün necə iştirak edə biləcəyimizi müəyyənləşdirmək istəyirik”, - Spiegel deyib.
Meta, YouTube, TikTok və Snap şirkətlərinə qarşı qaldırılan məhkəmə iddialarında onların platformalarının gənclərin psixi sağlamlığına mənfi təsir göstərdiyi iddia olunur. Snap şirkəti həmçinin qanunsuz narkotik satışına şərait yaratmaqda ittiham edilib.
01:43 18.09.2026
Oxunuş sayı: 64
