Rövşən Nəcəf: Süni intellekt və robot texnologiyaları ilə yanaşı ənənəvi bacarıqları da qorunmalıdır
Gələcəyin əmək bazarında uyğunlaşma qabiliyyəti və ömürboyu öyrənmək çox əhəmiyyətlidir.
Crossmedia.az xəbər verir ki, bunu SOCAR prezidenti Rövşən Nəcəf “Baku ID 2026” innovasiya festivalında çıxışı zamanı deyib.
O, avtomatlaşdırma, robot texnologiyaları və süni intellektin inkişafı fonunda əmək bazarında tələb olunan bacarıqların dəyişməsinə toxunub.
R.Nəcəf bildirib ki, qısamüddətli, ortamüddətli və uzunmüddətli anlayışların məzmunu dəyişir. Bu baxımdan ömürboyu öyrənmə xüsusi əhəmiyyət kəsb edir.
R. Nəcəf qeyd edib ki, süni intellekt, kibertəhlükəsizlik və digər texnologiyalarla bağlı məsələlərin miqyası və əhatə dairəsi hələ tam başa düşülməyib.
“Düşünürəm ki, əsas bacarıq uyğunlaşma qabiliyyəti olacaq. Müxtəlif şəraitlərə uyğunlaşmaq və fərqli vəziyyətlərdə fərqli hərəkət etmək vacibdir”, – deyə SOCAR prezidenti vurğulayıb.
“İnsanlar süni intellekt olmadan da işləyə bilməlidirlər”
SOCAR prezidenti bildirib ki, avtomatlaşdırma, robot texnologiyaları və süni intellektin inkişafı ilə yanaşı, bu texnologiyaların əlçatan olmadığı və ya istifadə edilə bilmədiyi hallara da hazır olmaq lazımdır.
O qeyd edib ki, texnologiyalardan istifadə etməyi öyrənən insanlar eyni zamanda süni intellekt, robot texnologiyaları və avtomatlaşdırma olmadan da öz vəzifələrini yerinə yetirmək bacarığına malik olmalıdırlar.
“Ənənəvi bacarıqlar hələ də aktualdır. Çünki gələcəkdə nələrin baş verəcəyini bilmirik”, – deyə R. Nəcəf bildirib.
Onun sözlərinə görə, dövlət və şirkət rəhbərləri müxtəlif ssenarilər üzrə planlar hazırlayırlar. Hər hansı problem yarandıqda alternativ planların olması vacibdir. Bu baxımdan insanların düşüncə tərzini vəziyyətə uyğun dəyişə bilməsi və yeni şəraitə uyğunlaşması mühüm bacarıqdır.
R. Nəcəf çıxışında peşə təhsilinin inkişafı ilə bağlı fikirlərini də bölüşüb.
O bildirib ki, peşə məktəblərində süni intellekt və robot texnologiyalarından istifadə bacarıqları ilə yanaşı, ənənəvi peşə bacarıqları da qorunmalıdır.
SOCAR prezidenti əlavə edib ki, insanlara bilik və bacarıqlarını başqalarına öyrətmək qabiliyyətinin aşılanması da vacibdir. Onun sözlərinə görə, peşəkar bacarıqlara malik insanların həmin bilikləri gələcək nəsillərə ötürməsi xüsusi əhəmiyyət daşıyır.
“Bu məkan ideyalar üçün evə çevrilməlidir”
R. Nəcəf SABAH.city-də yaradılan məkanın innovasiya və yeni ideyaların inkişafı üçün mühüm platformaya çevriləcəyinə ümidvar olduğunu bildirib.
“Ümid edirəm ki, bu məkan sərhədlərdən kənara çıxmağa, fərqli düşüncə tərzinə və innovativ ideyalara hazır olan insanların zehninə və ruhuna ev olacaq”, – deyə o qeyd edib.
SOCAR prezidenti vurğulayıb ki, məkanın əsas məqsədi yalnız infrastruktur yaratmaq deyil, həm də insanların özlərini rahat hiss etdiyi, yeni ideyalar irəli sürdüyü və müxtəlif ssenarilərə hazırlaşdığı bir mühit formalaşdırmaqdır.
O, SOCAR-da və digər şirkətlərdə peşə təhsili və peşə proqramlarının həyata keçirildiyini, bu proqramların yalnız şirkətin deyil, digər müəssisələrin də ehtiyaclarına uyğun kadrların hazırlanmasına xidmət etdiyini bildirib.
R. Nəcəf çıxışının sonunda uyğunlaşma qabiliyyəti və ömürboyu öyrənmənin gələcək əmək bazarında mühüm rol oynayacağını vurğulayıb.
Ayhan
11:38 17.09.2026
Oxunuş sayı: 51
