5 müsəlman ölkəsi Məkkə yaxınlığında husilərin hücumunu pisləyib
Türkiyə, Pakistan, Malayziya, Banqladeş və Maldiv adaları Səudiyyə Ərəbistanının müqəddəs Məkkə şəhəri yaxınlığında husilər tərəfindən həyata keçirildiyi bildirilən pilotsuz uçuş aparatının hücumunu kəskin şəkildə pisləyib.
Crossmedia.az xəbər verir ki, ölkələr hücumla bağlı yaydıqları bəyanatlarda İslamın ən müqəddəs məkanının təhlükəsizliyinin qorunmasının vacibliyini vurğulayıb, regionda gərginliyin daha da artmasının qarşısının alınmasına çağırış ediblər.
Türkiyə Xarici İşlər Nazirliyi çərşənbə günü Məkkə şəhərini hədəf alan hücumu kəskin şəkildə qınayıb və Səudiyyə Ərəbistanının təhlükəsizliyinə dəstəyini bir daha təsdiqləyib.
Nazirliyin bəyanatında deyilir:
“Regional sabitlik və təhlükəsizliyi də təhdid edən bu hücumların dərhal dayandırılması və gərginliyi daha da artırmağa yönəlmiş bütün addımlardan çəkinilməsi çağırışımızı təkrarlayırıq”.
Pakistanın Baş naziri Şahbaz Şərif də Məkkə yaxınlığında pilotsuz uçuş aparatının hücuma cəhdini pisləyib və dialoqa çağırış edib.
“İslamın müqəddəs məkanı Məkkə əl-Mükərrəməyə qarşı alçaq və mənfur pilotsuz uçuş aparatı hücuma cəhdini ən sərt şəkildə qınayıram”, – Şahbaz Şərif “X” sosial şəbəkəsində yazıb.
Malayziyanın Baş naziri Ənvər İbrahim isə Məkkə yaxınlığında pilotsuz uçuş aparatının zərərsizləşdirilməsindən sonra təmkin və dialoqa çağırıb. O, regionda gərginliyin daha da artmasına qarşı xəbərdarlıq edib.
“İslamın ən müqəddəs şəhərinin təhlükəsizliyinə və müqəddəsliyinə təhdid yaratmaq cəhdi tamamilə qəbuledilməzdir”, – Ənvər İbrahim bildirib.
Banqladeş Xarici İşlər Nazirliyi də hücumu pisləyərək müqəddəs məkanlara hörmət edilməsinə və onların qorunmasına çağırış edib.
“Banqladeş Məkkə əl-Mükərrəmənin və Krallıqdakı digər müqəddəs məkanların toxunulmazlığına dərin hörmətini bir daha təsdiqləyir, onların qorunmasında Səudiyyə Ərəbistanı Krallığı və xalqı ilə həmrəyliyini ifadə edir”, – nazirliyin bəyanatında qeyd olunub.
Maldiv adalarının Prezidenti Məhəmməd Muizzu da hücumu pisləyib. O, İslamın ən müqəddəs şəhərinin təhlükəsizliyinə və müqəddəsliyinə təhdid yaradan hər hansı əməlin qəbuledilməz olduğunu bildirib.
“İslamın ən müqəddəs şəhərinin təhlükəsizliyinə və müqəddəsliyinə təhdid yaradan hər hansı əməl tamamilə qəbuledilməzdir və bütün müsəlman ümməti üçün dərin təhqirdir”, – Muizzu “X” sosial şəbəkəsində yazıb.
Qeyd edək ki, Səudiyyə Ərəbistanının rəhbərlik etdiyi koalisiya çərşənbə günü səhər saatlarında Yəməndəki husilər tərəfindən Məkkə yaxınlığına buraxıldığı bildirilən pilotsuz uçuş aparatının hava hücumundan müdafiə sistemləri tərəfindən tutulduğunu və məhv edildiyini açıqlayıb.
Koalisiyanın sözçüsü Türki əl-Maliki bildirib ki, pilotsuz uçuş aparatı çərşənbə axşamı yerli vaxtla saat 18:50-də (Qrinviç vaxtı ilə 15:50) məhdudlaşdırılmış hava məkanına daxil olmamışdan əvvəl zərərsizləşdirilib. Aparatın qalıqları şəhərin cənubuna düşüb.
Husilər isə pilotsuz uçuş aparatının buraxılmasına görə məsuliyyəti inkar ediblər.
05:32 17.09.2026
Oxunuş sayı: 54
