20 Sentyabr – Azərbaycan dövlətçiliyinin qürur səhifəsi
Azərbaycan tarixində elə günlər vardır ki, onlar xalqımızın milli yaddaşında azadlıq, müstəqillik və dövlətçilik arzularının simvoluna çevrilmişdir. Bu günlər təkcə tarixi hadisələrin xatırlanması deyil, həm də milli kimliyimizin, vətəndaşlıq qürurumuzun, xalqımızın iradə və əzminin parlaq ifadəsidir. Belə əlamətdar günlərdən biri də 20 Sentyabr – Dövlət Suverenliyi Günüdür.
1991-ci ilin sentyabrında qəbul edilən “Azərbaycan Respublikasının Dövlət Suverenliyi haqqında Bəyannamə” müstəqilliyimizin hüquqi əsasını qoysa da, sonrakı onilliklərdə suverenliyimizin tam bərqərar olması qarşısında ciddi maneələr mövcud idi. Torpaqlarımızın 20 faizinin işğalı, ölkə daxilində fəaliyyət göstərən separatçı qurum və xarici təhdidlər dövlətçiliyimizin güclənməsinə mane olurdu.
Bu tarixi yolun dönüş nöqtəsi isə 2020-ci ildəki 44 günlük Vətən müharibəsi və ardınca 2023-cü ilin 19–20 sentyabrında həyata keçirilmiş lokal antiterror tədbirləri oldu. Əgər Vətən müharibəsi nəticəsində torpaqlarımızın böyük hissəsi azad edilərək ərazi bütövlüyümüz bərpa olundu, isə 2023-cü il əməliyyatları ilə Azərbaycan dövlətinin tam suverenliyi təmin edildi.
Cəmi 23 saat 43 dəqiqə davam edən bu əməliyyat həm sürəti, həm də dəqiqliyi ilə hərb tarixində nadir nümunələrdən biri oldu. Azərbaycan Ordusu peşəkarlıqla, mülki əhaliyə zərər vermədən, qısa müddətdə separatçı silahlı birləşmələri zərərsizləşdirdi. Beləliklə, otuz ildən artıq müddətdə Qarabağda mövcud olan separatizmin kökü birdəfəlik kəsildi.
Bu Qələbə təkcə hərbi əməliyyat deyildi, həm də dövlət suverenliyimizin tam bərpası idi. Çünki illərlə Qarabağ iqtisadi zonasında fəaliyyət göstərən qondarma qurum Azərbaycanın müstəqilliyinə, ərazi bütövlüyünə və daxili idarəetməsinə mane olurdu. 2023-cü ilin sentyabr əməliyyatları ilə dövlətimizin hüquqi və siyasi məkanında heç bir qanunsuz qurum qalmadı, Azərbaycanın bütün ərazilərində konstitusiya hakimiyyəti tam bərqərar edildi.
Məhz bu səbəbdən 2023-cü il sentyabr hadisələri müasir tariximizin ən şanlı səhifələrindən biri, 1991-ci ildən bəri gedən suverenlik mübarizəsinin zirvəsi oldu. Azərbaycan xalqı öz müstəqilliyini yalnız bəyan etməklə kifayətlənmədi, həm də onu real şəkildə bütün ərazilərdə təmin etdi.
Bu tarixi nailiyyətin dövlətçilik tariximizdə rəsmən təsdiqi isə Azərbaycan Respublikasının Prezidenti cənab İlham Əliyevin 19 sentyabr 2024-cü il tarixli Sərəncamı ilə həyata keçirildi. Həmin sərəncama əsasən, hər il 20 sentyabr – Dövlət Suverenliyi Günü kimi qeyd olunur. Bu qərar xalqımızın 30 ildən artıq davam edən mübarizəsinin məntiqi yekunu, həm də qəhrəmanlıqla yazılan tariximizin rəsmi dövlət səviyyəsində əbədiləşdirilməsidir.
Bu gün biz artıq suverenliyini tam bərpa etmiş, sərhədləri toxunulmaz, ərazi bütövlüyü təmin olunmuş, regionun ən güclü dövlətlərindən biri kimi inkişaf edən Azərbaycanın vətəndaşlarıyıq. Bu, hər birimiz üçün qürur mənbəyi olmaqla yanaşı, eyni zamanda böyük məsuliyyətdir. Çünki suverenliyin qorunması, müstəqilliyin möhkəmləndirilməsi və dövlətçiliyimizin gələcək nəsillərə ötürülməsi hər bir vətəndaşın müqəddəs borcudur.
20 Sentyabr – Dövlət Suverenliyi Günü tariximizdə müstəqilliyin təntənəsi, milli birliyin, dövlətçilik əzminin və gələcək ümidlərin rəmzidir. Bu günün qeyd olunması, bir tərəfdən, xalqımızın qəhrəmanlıq dolu keçmişinə ehtiramdır, digər tərəfdən isə gələcək nəsillərə ünvanlanmış böyük bir mesajdır: Azərbaycan xalqı heç vaxt azadlıq amalından dönməmişdir və dönməyəcəkdir.
Elmir Heydərli
11:17 16.09.2025
Oxunuş sayı: 9274
