Mehriban Əliyeva - zəriflik və qüdrətin rəmzi

Azərbaycanın müasir tarixində parlaq bir ulduz kimi parlayan Mehriban Arif qızı Əliyeva, 26 avqust 1964-cü ildə Bakı şəhərində, ziyalı və mədəni irsin zəngin ocağında dünyaya göz açmışdır. O, təkcə Azərbaycan Respublikasının Birinci vitse-prezidenti deyil, həm də Prezident İlham Əliyevin sadiq həyat yoldaşı, Heydər Əliyev Fondunun və Azərbaycan Mədəniyyət Fondunun prezidenti, Azərbaycan Gimnastika Federasiyasının rəhbəri, Yeni Azərbaycan Partiyasının sədrinin birinci müavini kimi tanınır. Mehriban xanım, adının mənası kimi – mehriban və yumşaq qəlbli bir şəxsiyyət olaraq, millətin mədəniyyətini, təhsilini və rifahını yüksəltmək yolunda yorulmaz fəaliyyəti ilə Azərbaycanın simvoluna çevrilmişdir.

Mehriban Əliyevanın uşaqlığı və gəncliyi Azərbaycan ziyalılarının əhatəsində keçib. O, yazıçı və ədəbiyyatşünas Mir Cəlal Paşayevin və görkəmli jurnalist, pedaqoq Nəsir İmanquliyevin nəvəsidir. Atası Arif Paşayev – Milli Elmlər Akademiyasının akademiki, Dövlət mükafatı laureatı, fizika-riyaziyyat elmləri doktoru və professor, 1996-cı ildən bəri "Azərbaycan Hava Yolları" QSC Milli Aviasiya Akademiyasının rektoru kimi tanınan görkəmli alim və ictimai xadimdir. Anası Aida İmanquliyeva isə şərqşünas, ədəbiyyatşünas, tənqidçi və tərcüməçi, filologiya elmləri doktoru, professor – Azərbaycanda ərəb ədəbiyyatı üzrə ilk qadın elmlər doktoru və professor olmuşdur. Bu zəngin ailə mühitində böyüyən Mehriban xanım, ötən əsrin mürəkkəb dövrlərinə baxmayaraq, milli ənənələrə, mənəvi dəyərlərə və ideallara sadiq qalaraq formalaşmışdır. Bu dəyərlər sonradan onun ailə həyatında da dərin kök salmışdır.

1983-cü ildə Mehriban xanım İlham Əliyevlə ailə həyatı qurub və Leyla, Arzu və Heydər adlı üç övladları dünyaya gəlib. Həyat yoldaşı İlham Əliyev Mehriban xanım haqqında danışarkən qeyd etmişdi: "Təbii ki, hər bir ana kimi, mənim də anam gəlin tapmağa çalışırdı. Amma Mehribanla tanış olanda özlüyümdə qərara aldım ki, bax, bu qız xoşuma gəlir. … Əlbəttə, zahiri görünüş böyük rol oynayır. Amma onun daxili aləmindən gələn və indi də gəlməkdə olan mehribanlıq, yəqin ki, zahiri görkəmi ilə yanaşı daha çox cəlb edirdi." Bu sözlər, Mehriban xanımın yalnız xarici gözəlliyini deyil, daxili dünyasının zənginliyini də vurğulayır. O, milli ənənələrə bağlı bir ziyalı ailəsindən gələrək, Heydər Əliyev və akademik Zərifə Əliyevanın gəlini olmaqla bu dəyərləri daha da möhkəmləndirmişdir.

Mehriban Əliyevanın təhsil və kariyera yolu da parlaq nailiyyətlərlə doludur. 1988–1992-ci illərdə Moskvada akademik Krasnovun rəhbərliyi altında Göz Xəstəlikləri Elmi-Tədqiqat İnstitutunda çalışaraq tibb sahəsində təcrübə qazanmışdır. Lakin onun ictimai fəaliyyəti 1995-ci ildə Azərbaycan Mədəniyyət Fondunun yaradılması ilə yeni bir mərhələyə qədəm qoymuşdur. Bu fond vasitəsilə Azərbaycan mədəniyyətini təbliğ etmək məqsədilə 1996-cı ildə üç dildə (Azərbaycan, ingilis və rus) çap olunan Azərbaycan-İrs jurnalını təsis etmişdir. Öz müsahibələrindən birində bu təşəbbüsləri belə izah edir:

"Azərbaycan Mədəniyyətinin Dostları Fondunu yaradarkən onun əsas məqsədi Azərbaycan mədəniyyətini təbliğ etmək, tanıtdırmaq idi... Fond da, jurnal da kifayət qədər mürəkkəb vəzifələri yerinə yetirməli idi. O illər müstəqil Azərbaycanın təşəkkül illəri idi. Siyasi, iqtisadi dəyişikliklərlə yanaşı, köhnə ideologiyadan xilasolma prosesi də gedir, stereotiplər dağıdılırdı. Kifayət qədər təlatümlü həmin dövrdə mədəni irsimiz yenidən fikir süzgəcindən keçirilir, əzəli milli ənənələrə və köklərə qayıdılırdı."

2002-ci ildə Azərbaycan Gimnastika Federasiyasının prezidenti seçilən Mehriban xanım bu sahədə də böyük uğurlar əldə etmişdir. Onun təşkilatçılıq qabiliyyəti sayəsində Azərbaycan beynəlxalq gimnastika yarışlarının mərkəzinə çevrilmiş, ölkəmizdə bir sıra dünya və Avropa çempionatları keçirilmişdir. Bu nailiyyətlər Mehriban xanımın beynəlxalq nüfuzunun və fədakarlığının bariz nümunəsidir.

Onun ən böyük xidmətlərindən biri Heydər Əliyev Fondunun fəaliyyətidir. 2004-cü ilin 10 mayında təsis edilən Fond milli-mənəvi dəyərlərin qorunması, Azərbaycan mədəniyyətinin təbliği, əhalinin rifahının yüksəldilməsi, elm, təhsil, mədəniyyət, səhiyyə və idmanın inkişafı kimi sahələrdə saysız-hesabsız layihələr həyata keçirir. Fond həmçinin uşaq və gənclərin sağlam, milli dəyərlərə sadiq vətəndaş kimi yetişdirilməsinə, Azərbaycanın beynəlxalq nüfuzunun artırılmasına xidmət edir.

Mehriban xanımın rəhbərliyi ilə Fond təkcə ölkə daxilində deyil, dünyada da humanitar missiya aparır. Onun təşəbbüsü ilə Pakistanda məktəb və xəstəxanaların tikilməsi, uşaq evlərinə yardım, zəlzələdən zərərçəkənlərə dəstək, müxtəlif ölkələrdə mədəniyyət abidələrinin bərpası kimi layihələr həyata keçirilmişdir. Bu fəaliyyəti nəticəsində Mehriban Əliyeva UNESCO və ISESCO-nun xoşməramlı səfiri kimi beynəlxalq miqyasda da böyük etimad qazanmışdır.

Xüsusilə qeyd etmək lazımdır ki, Mehriban Əliyeva ölkəmizdə şəhid ailələrinin, qazilərin, müharibə veteranlarının, eləcə də valideyn himayəsindən məhrum olmuş körpələrin etibarlı dayağıdır. Onun hər bir layihəsi, hər bir addımı Azərbaycan analarının şəfqətini və qayğısını əks etdirir. Mehriban xanımın şəhid ailələrinə mütəmadi səfərləri, onların sosial rifahının yaxşılaşdırılması üçün qəbul edilən proqramlar, uşaq evləri və internat məktəblərinə göstərilən xüsusi diqqət bu qayğının təzahürüdür.

Mehriban xanım həmçinin milli birliyin və həmrəyliyin təcəssümüdür. Onun fəaliyyəti Azərbaycanda müxtəlif ictimai qruplar, milli azlıqlar və dini icmalar arasında tolerantlıq və qarşılıqlı hörmət mühitinin möhkəmlənməsinə mühüm töhfə vermişdir. Xalqın sevgisi və etimadı Mehriban Əliyevanın humanist xarakterinin, geniş dünyagörüşünün və ölkəsinə sədaqətinin nəticəsidir.

Mehriban Əliyeva – təkcə bir siyasətçi və ictimai xadim deyil, o, Azərbaycan qadınının gücü, mehribanlığı və intellektinin təcəssümüdür. Onun fəaliyyəti, millətin mədəni irsini qorumaqdan tutmuş, gənclərin gələcəyini formalaşdırmağa və xeyriyyə vasitəsilə beynəlxalq humanitar kömək təmin etməyə qədər uzanır. Bu gün Mehriban xanım, Azərbaycanın inkişaf yolunda ilham mənbəyi olaraq qalır – mehriban bir qəlb, qüdrətli bir iradə və sonsuz fədakarlıqla. Onun həyatı Azərbaycanın parlaq gələcəyinin açarıdır və dünya miqyasında humanitar dəyərlərin simvoluna çevrilir.

“Mehribanlıq insanın qəlbinin aynasıdır, Mehriban Əliyeva isə bir xalqın mərhəmət simvoludur.”

Doğum gününüz mübarək, Mehriban xanım! Azərbaycanın işığı və xalqımızın qəlbindəki mehribanlıq simvolu olaraq daim ilham verməyiniz diləyi ilə.

Ayhan Ağarzayev, 

Elmir Heydərli