Ryabkov: ABŞ-lə dialoqda hələlik diplomatik mülkiyyət məsələsində irəliləyiş yoxdur
Rusiya xarici işlər nazirinin müavini Sergey Ryabkov bildirib ki, Rusiya və ABŞ arasında diplomatik mülkiyyətin geri qaytarılması və birbaşa aviareyslərin bərpası ilə bağlı dialoqda hələlik heç bir irəliləyiş əldə olunmayıb.
Crossmedia.az xəbər verir ki, bu barədə Ryabkov TASS agentliyinə müsahibəsində deyib. Onun sözlərinə görə, tərəflər nə diplomatik mülkiyyət, nə də birbaşa hava əlaqəsinin bərpası məsələsində razılığa gələ biliblər.
“Bunlar məhz münasibətlərdə qıcıqlandırıcı məqamlardır. Diplomatik mülkiyyət və birbaşa aviareyslərin bərpası üzrə heç bir irəliləyiş yoxdur”, – deyə Rusiya XİN başçısının müavini qeyd edib.
Ryabkov sonradan nəticəsiz elan ediləcək yüksək səviyyəli görüşlərin keçirilməsinin əks-məhsuldar ola biləcəyini bildirib.
“Məhz buna görə də dialoqun nisbətən daha aşağı səviyyəyə keçirilməsi qərara alınıb ki, ekspertlər hazırlıq işlərini həyata keçirsinlər”, – deyə o əlavə edib.
Qeyd edək ki, dekabrın 23-də Ryabkov Moskva və Vaşinqtonun ikitərəfli münasibətlərdə mövcud olan qarşılıqlı qıcıqlandırıcı məsələlər üzrə növbəti məsləhətləşmə raundunu keçirdiyini təsdiqləyərək, onların aradan qaldırılması istiqamətində səylərin davam etdiriləcəyini bildirmişdi.
Turqut Ansari
15:04 25.01.2026
Oxunuş sayı: 436
