Suriyanın şimalında həyəcan: PKK–SDQ xətti yenidən aktivləşir
Məlumata görə, PKK terror təşkilatının liderlərindən biri kimi tanınan Bahoz Erdal Qəndil dağlarından Suriyanın Tabqa bölgəsinə gələrək Suriya Demokratik Qüvvələrinə rəhbərlik etməyə başlayıb.
Crossmedia.az bu barədə xarici mediaya istinadən xəbər verir.
Bildirilib ki, SDQ və PKK silahlı qrupları mümkün yeni hücumlara hazırlıq məqsədilə bölgəyə İran istehsalı olan pilotsuz uçuş aparatları (PUA) gətiriblər. Bu addım regionda təhlükəsizlik vəziyyəti ilə bağlı narahatlıqları artırıb.
Suriya Ordusunun yaydığı açıqlamaya görə, 2013-cü ildə Reyhanlı rayonunda törədilmiş terror aktının əsas təşkilatçılarından biri kimi tanınan və terrorçu qismində axtarışda olan Mihraç Ural da hazırda Tabqa bölgəsindədir.
Qeyd olunur ki, Türkiyə vətəndaşı olan Mihraç Ural uzun illərdir Suriyada fəaliyyət göstərir və devrilmiş "BƏƏS" rejiminə yaxın silahlı strukturlarla əməkdaşlıq edən qruplaşmanın liderlərindən biri hesab olunur. Onun Suriya müharibəsi dövründə Türkiyəyə qarşı düşmən mövqeyi, silahlı təxribatlar və kəşfiyyat-diversiya xarakterli fəaliyyətlərlə gündəmə gəldiyi bildirilir.
Analitiklər bu proseslərin Suriyanın şimalında gərginliyin artmasına və yeni təhlükəsizlik risklərinin formalaşmasına səbəb ola biləcəyini qeyd edirlər.
Kübra Musayeva
11:31 17.01.2026
Oxunuş sayı: 1345
