Suriya prezidenti kürdlərlə bağlı tarixi fərman imzalayıb
Suriya Prezidenti Əhməd əl-Şaraa ölkədə yaşayan kürdlərin hüquqları ilə bağlı genişmiqyaslı fərman imzalayıb. Fərman Suriyada etnik və mədəni hüquqların tanınması istiqamətində mühüm addım kimi qiymətləndirilir.
Crossmedia.az bu barədə xarici mediaya istinadən xəbər verir.
Sənədə əsasən, Suriya kürdləri Suriya xalqının və milli kimliyinin ayrılmaz hissəsi kimi tanınır. Kürd xalqının mədəni və dil hüquqları rəsmi şəkildə qəbul edilir və dövlət tərəfindən qorunacaq.
Fərmana görə, kürdlərin məskunlaşdığı ərazilərdə dövlət və özəl məktəblərdə kürd dilinin tədrisinə icazə veriləcək. Bununla yanaşı, 1962-ci ildə əl-Həsəkə bölgəsində aparılmış və geniş tənqidlərə səbəb olan siyahıyaalmanın bütün nəticələri ləğv edilir, vətəndaşlıq hüquqları isə tam və bərabər şəkildə bərpa olunur.
Sənəddə həmçinin Novruz bayramının bütün ölkə üzrə ödənişli milli bayram elan edildiyi qeyd olunur. Etnik mənsubiyyətə və ya dilə görə ayrı-seçkiliyin qadağan edildiyi vurğulanır.
Fərmana əsasən, dövlət mediası və təhsil müəssisələri inklüziv milli diskursu təşviq etməli, ölkədə birlik və bərabərlik ideyalarını ön plana çıxarmalıdır.
Müşahidəçilər bu qərarı Suriyada uzun illər davam edən etnik gərginliyin azaldılması və milli barışığın möhkəmləndirilməsi istiqamətində mühüm siyasi addım kimi dəyərləndirirlər.
Kübra Musayeva
10:19 17.01.2026
Oxunuş sayı: 1399
