Özbəkistanda dəbdəbəli toy və mərasimlərə vergi tətbiqi müzakirə olunur
Özbəkistanda həddindən artıq dəbdəbəli toylar, yubileylər və yas mərasimlərinin vergiyə cəlb edilməsi təklif olunub. Yeni təşəbbüsə əsasən, bu cür mərasimlərdə iştirak edən hər bir dəvətli qonaq üçün ayrıca ödəniş nəzərdə tutulur.
Crossmedia.az bu barədə xarici mediaya istinadən xəbər verir.
Özbəkistan parlamentinin spikeri Nurdinjon Kadirov məsələ ilə bağlı bildirib ki, toy və mərasimlər insanların maddi imkanlarını nümayiş etdirmək vasitəsinə çevrilməməlidir. Onun sözlərinə görə, bu addım cəmiyyətdə sosial bərabərliyi qorumaq və ailələrin lazımsız maliyyə yükü altına düşməsinin qarşısını almaq məqsədi daşıyır.
Qeyd olunur ki, ölkədə son illər toy və digər ailə mərasimlərinin həddən artıq təmtəraqlı keçirilməsi sosial təzyiq yaradıb və bir çox ailələr bu səbəbdən borclanmağa məcbur qalıb. Təklif olunan mexanizm həm bu tendensiyanı zəiflətmək, həm də israfçılığın qarşısını almaq üçün nəzərdə tutulur.
Məsələ hələlik müzakirə mərhələsindədir və verginin məbləği, eləcə də tətbiq mexanizmləri ilə bağlı konkret qərar qəbul olunmayıb. Lakin təşəbbüs artıq cəmiyyətdə geniş rezonans doğurub.
Sevinc Yarməmmədova
21:16 16.01.2026
Oxunuş sayı: 1298
