Qazaxıstan polisi azərbaycanlı sürücülərə kömək edib
Qazaxıstanda Mamlyutka–Kostanay avtomobil yolunda yanvarın 13-nə keçən gecə Azərbaycan vətəndaşı olan üç qardaş çətin vəziyyətlə üzləşib. Qazaxıstan istehsalı olan mərciməyi Türkiyəyə daşıyan sürücülər güclü şaxta səbəbindən dizel yanacağının donması nəticəsində yük maşınını işə sala bilməyiblər və təxminən iki gün yolda qalıblar.
Crossmedia.az bu barədə xarici mediaya istinadən xəbər verir.
Hadisə yerində patrul polisi və ərazi polis şöbəsinin əməkdaşları sürücülərin, texnikanın və yükün təhlükəsizliyini təmin edərək gecə-gündüz nəzarət aparıblar. Xilasetmə işlərinə Fövqəladə Hallar Xidmətinin əməkdaşları da cəlb olunub.
Şaxtanın kəskin olması səbəbindən dizel yanacağı ilə işləyən istilik qurğuları effektiv olmayıb. Bu səbəbdən yük maşını lehim lampaları vasitəsilə qızdırılıb. Polis əməkdaşları prosesi sürətləndirmək üçün şəxsi avadanlıqlarını da hadisə yerinə gətiriblər.
Bununla yanaşı, Presnov kənd dairəsinin akimat nümayəndələri sürücülərə gecələmə və qida ilə bağlı dəstək göstəriblər. Texnikanın qızdırılması və təmir işləri növbəti günün böyük hissəsini əhatə edib və yanvarın 15-i səhər saatlarında azərbaycanlı sürücülər yollarına davam edərək Türkiyəyə doğru hərəkət ediblər.
Sevinc Yarməmmədova
21:12 16.01.2026
Oxunuş sayı: 1064
