Xarici orduların gəlişi Qrenlandiyada sosial narahatlıq yaradıb
Qrenlandiyada yaşayan sakinlər bildirirlər ki, son günlər xarici hərbi qüvvələrin bölgəyə gəlməsi xüsusilə uşaqlar arasında qorxu və narahatlığa səbəb olub. Valideynlər deyir ki, uşaqlar baş verənləri anlamaqda çətinlik çəkir və cavabsız suallar onları qorxudur.
Crossmedia.az bu barədə TRTWORLD-a istinadən xəbər verir. Valideynlərdən biri Najannguaq bildirib ki, uşaqları amerikalı əsgərlərin Qrenlandiyaya gələ biləcəyi xəbərlərindən ciddi şəkildə narahatdır. “Mənə cavab verə bilmədiyim suallar verirlər,” – deyə o bildirib. “Soruşurlar ki, ‘Onlar atəş açacaqlarmı?’ Açığı, bunu mən də bilmirəm.”
Bölgədə artan hərbi varlıq ailələr arasında gərginlik yaradıb. Sakinlərin sözlərinə görə, artıq bəzi hərbçilər Qrenlandiyaya gəlib, yaxın günlərdə isə “Qrenlandiyanın qorunması” adı altında daha çox əsgərin gələcəyi gözlənilir. Lakin aydın məlumatın olmaması qeyri-müəyyənliyi daha da artırır.
“Özümü çox narahat hiss edirəm,” – deyə valideyn qeyd edib. “Bu gün, dünən - müxtəlif ordular gəlir. Gəliblər və gəlməkdə davam edəcəklər. Bu da məni qorxudur.”
Uşaqlar vəziyyətdən xüsusilə ağır təsirləniblər. “Məndən dəfələrlə soruşurlar ki, əsgərlər gəlirmi,” – deyə valideyn Larna bildirib. “Mən ‘yox’ deyə bilmirəm, amma ‘bəli’ də deyə bilmirəm. Çoxlu cavabsız suallar var və bu da uşaqlarımın gecələr yatmaqdan qorxmasına səbəb olur. Çünki səhər nə ilə oyanacaqlarını bilmirlər.”
Sakinlər Qrenlandiyanın hər hansı maddi maraq qarşılığında satılması və ya nəzarət altına alınması fikirlərini qətiyyətlə rədd edirlər. “Biz satılmırıq,” – deyə valideyn vurğulayıb. “Pul istəmirik. Təşəkkürlər, yox. Biz ölkəmizi sevirik. Azad Qrenlandiya istəyirik.”
Gərginlik xarici bir siyasi liderin Qrenlandiyanın “asan və ya çətin yolla” ələ keçirilə biləcəyi ilə bağlı açıqlamalarından sonra daha da artıb. Həmin bəyanatlardan sonra sakinlər son günləri emosional baxımdan olduqca ağır keçirdiklərini deyirlər.
“Bu, əsl emosional rollercoaster idi,” – deyə valideyn bildirib. “Nə etməli olduğumuz, nəyə hazırlaşmalı olduğumuzla bağlı böyük qeyri-müəyyənlik var.”
Sevinc Yarməmmədova
12:34 16.01.2026
Oxunuş sayı: 1153
