Xarici xəbərlər
Kadırovdan şayiələrə cavab: Hər şey qaydasındadır
Çeçenistan rəhbəri Ramzan Kadırov səhhəti ilə bağlı yayılan məlumatlara aydınlıq gətirib.
Crossmedia.az bu barədə xarici mediaya istinadən xəbər verir.
O, özünü yaxşı hiss etdiyini və ciddi sağlamlıq problemi yaşamadığını bildirib.
Mətbuatın yazdığına görə, Kadırov bu mövzuda yayılan şayiələrə emosional reaksiya verərək səhhətinin normal olduğunu vurğulayıb. Onun sözlərinə görə, həyati vacib orqanları ilə bağlı hər hansı narahatlıq yoxdur:
“Uca Allaha and olsun ki, böyrəyimdə, qaraciyərimdə, dalağımda, mədəmdə heç bir ağrı yoxdur. Bircə odur ki, qara bibərə dözə bilmirəm, amma hər şey qaydasındadır. Gücüm kifayət qədərdir”.
Kadırov qeyd edib ki, özünü enerjili hiss edir və gündəlik iş fəaliyyətini əvvəlki kimi davam etdirir. O, səhhəti ilə bağlı yayılan xəbərlərin əsassız olduğunu, bu cür məlumatların məqsədli şəkildə dövriyyəyə buraxıldığını da istisna etməyib.
Son dövrlər Çeçenistan liderinin sağlamlıq durumu ilə bağlı sosial şəbəkələrdə və bəzi media resurslarında müxtəlif iddialar səsləndirilirdi. Kadirovun bu açıqlaması isə həmin müzakirələrə son qoymaq məqsədi daşıyır.
Kübra Musayeva
11:35 16.01.2026
Oxunuş sayı: 1806
