ABŞ İranda keçid ssenarisini dəyərləndirir
ABŞ Prezidenti Donald Tramp administrasiyasına yaxın mənbələr Vaşinqtonun İranda mümkün keçid dövrü üçün şahzadə Rza Pəhləvidən çox islahatçı siyasi fiqurlara üstünlük verdiyini bildirir.
Crossmedia.az bu barədə xarici KİV-ə istinadən xəbər verir. Məlumata görə, ABŞ sabiq prezidentlər Məhəmməd Hətəmi və Həsən Ruhanini, eləcə də hazırkı islahatçı qanadın əsas simalarından sayılan Məsud Pezeşkianı mümkün keçid modelində əsas fiqurlar kimi nəzərdən keçirir. Lakin İran Konstitusiyasına əsasən Hətəmi və Ruhani artıq iki dəfə prezident seçildikləri üçün yenidən bu posta namizəd ola bilməzlər.
Mənbələrin iddiasına görə, Vaşinqton bu səbəbdən Hətəmi və Ruhaninin formal dini lider statusunda, icraedici hakimiyyətin isə daha geniş səlahiyyətlərlə Pezeşkianın nəzarətində olmasına üstünlük verə bilər. ABŞ-ın əsas hədəfi islahatçı qanadla yeni nüvə sazişinə nail olmaq və İran neftinin yenidən dünya bazarına qaytarılmasıdır.
Eyni zamanda Tramp administrasiyasının mühafizəkar qanadı və SEPAH-ın (İran İslam İnqilabı Keşikçiləri Korpusu) təsirini zəiflətmək üçün onlara qarşı sərt hərbi və siyasi addımları da istisna etmədiyi bildirilir.
Qeyd olunur ki, Vaşinqton Ruhani və Hətəmini Qərblə praqmatik dialoqa açıq şəxslər hesab edir. Onlar uzun illər ərzində İranda ali dini rəhbərliyə qarşı daxili müxalifətin əsas simaları kimi çıxış ediblər. Mənbələrin məlumatına görə, İran–İraq müharibəsi dövründə də ali dini rəhbərliyin geri çəkilməsinə təsir göstərən fiqurlar məhz bu xəttin nümayəndələri olub.
Həm Ruhani, həm də Hətəmi mərhum Əkbər Haşimi Rəfsancaniyə yaxın siyasi klana mənsub sayılır. Geniş təzyiqlərə baxmayaraq, hər iki siyasətçinin hələ də ölkə daxilində müəyyən sosial dayaqları qoruduğu qeyd olunur. ABŞ isə onların potensial olaraq xalq dəstəyini cəlb edə biləcəyinə ümid edir.
22:10 14.01.2026
Oxunuş sayı: 1345
