Mirzoyan və Rubio TRIPP layihəsinin icrası ilə bağlı bəyannamə imzaladılar
Ermənistanın xarici işlər naziri Ararat Mirzoyan və ABŞ dövlət katibi Marko Rubio TRIPP layihəsinin həyata keçirilməsinə dair bəyannamə qəbul ediblər.
Crossmedia.az xəbər verir ki, bu barədə ABŞ Dövlət Departamenti məlumat yayıb.
Açıqlamada bildirilir ki, TRIPP-in İcra Çərçivəsi layihənin praktik şəkildə tətbiqi üçün konkret yol xəritəsini müəyyən edir. Sənəd Ermənistan ərazisi daxilində multimodal tranzit əlaqəsinin təmin olunmasını nəzərdə tutur. TRIPP çərçivəsində Azərbaycanın əsas hissəsinin Naxçıvan Muxtar Respublikası ilə birləşdirilməsi və Transxəzər ticarət marşrutunda mühüm bir həlqənin yaradılması planlaşdırılır.
Dövlət Departamentinin məlumatına görə, layihənin həyata keçirilməsi Ermənistanın həm beynəlxalq, həm də daxili nəqliyyat əlaqələrinə qarşılıqlı fayda gətirəcək. TRIPP-in İcra Çərçivəsi Prezident Donald Trampın təşəbbüsü ilə 8 avqust 2025-ci ildə keçirilən tarixi Sülh Zirvəsində bir daha təsdiqlənmiş prinsiplərə əsaslanır və layihənin uğuru üçün suverenlik, ərazi bütövlüyü və qarşılıqlılıq prinsiplərinin vacibliyini vurğulayır.
Qeyd olunur ki, TRIPP-in əsas məqsədi Ermənistan və Azərbaycanın rifahını və təhlükəsizliyini artırmaq, regional ticarət və nəqliyyat əlaqələrini genişləndirmək, eləcə də Mərkəzi Asiya və Xəzər regionunu Avropa ilə birləşdirən yeni tranzit imkanları yaratmaqdır. Layihənin eyni zamanda Amerika ticarətinin inkişafına töhfə verməsi gözlənilir.
Nəzrin Abbas
09:33 14.01.2026
Oxunuş sayı: 1681
