İsrail rəsmiləri ABŞ-nin İrana qarşı potensial hərbi əməliyyatlarını təxirə salmağı Ağ Evə təklif ediblər. Bildirilir ki, israilli rəsmilər İranda rejim dəyişikliyini və ABŞ-nin bu istiqamətdə səylərini tam dəstəkləsələr də, hazırkı mərhələdə xarici hərbi müdaxilənin ölkədəki etirazçıların məqsədlərinə çatmasına mane ola biləcəyindən narahatdırlar.
Crossmedia.az xəbər verir ki, bu barədə NBC News məlumat yayıb.
Mənbənin məlumatına əsasən, İsrail tərəfi ABŞ-yə alternativ variantlar da təqdim edib. Bu variantlara İranda internet bağlantısının yaxşılaşdırılması, iqtisadi sanksiyaların gücləndirilməsi və kiberhücumların həyata keçirilməsi daxildir.
Qeyd olunur ki, ABŞ prezidenti Donald Tramp hələlik İrana qarşı atılacaq addımlarla bağlı yekun qərar verməyib. O, Ağ Evin bu məsələdə qərarsız olduğunu və müzakirələrin davam etdiyini bildirib.
Xatırladaq ki, yanvarın 14-də Donald Tramp İrandakı etirazçılara dəstək məqsədilə iqtisadi tədbirlərin görülə biləcəyini açıqlamışdı. ABŞ prezidenti, həmçinin, etirazlar zamanı qan tökülməsi dayandırılana qədər İran rəsmiləri ilə bütün görüşlərin ləğv ediləcəyini bəyan etmişdi.
Nəzrin Abbas
