Ünvanlı dövlət sosial yardımının qaydaları dəyişdi - Hüquqşunas izahı
2025-ci ilin 1 sentyabrından Azərbaycanda ünvanlı dövlət sosial yardımının qaydalarında tətbiq olunan dəyişikliklər aztəminatlı ailələrin sosial təminat imkanlarını genişləndirməyə yönəlib. Bu dəyişikliklər həm yardıma çıxış imkanlarını asanlaşdırır, həm də müraciət prosesini sadələşdirərək vətəndaşların vaxtına qənaət edir. Yeni qaydalar sosial müdafiə sisteminin daha şəffaf, çevik və əlçatan olmasına xidmət edir.
Mövzu ilə bağlı Crossmedia.az-a hüquqşünas Xəyalə Hənifəli açıqlama verdi.
"2025-ci ilin 1 sentyabrından Azərbaycanda ünvanlı dövlət sosial yardımının qaydalarında bir sıra yeniliklər tətbiq olunub".
Hüquqşünas qeyd edib ki, bu dəyişikliklər aztəminatlı ailələrin sosial yardıma çıxış imkanlarını artırmaq və müraciət prosesini sadələşdirmək məqsədi daşıyır.
"Əsas dəyişikliklər:
Maddi-məişət şəraitinin müayinəsi: Əgər ailə təkrar müraciət edirsə və ailə tərkibi ilə yaşayış ünvanında dəyişiklik olmayıbsa, bəzi hallarda maddi-məişət şəraitinin müayinəsi aparılmayacaq. Bu, aşağıdakı hallarda mümkün olacaq:
Ailədə ailə başçısını itirməyə görə pensiya və ya müavinət alan şəxs olduqda;
Ailədə I dərəcə əlilliyi olan bir nəfər, yaxud II dərəcə əlilliyi olan iki və daha çox ailə üzvü olduqda;
Ailədə üç və daha çox uşaq olduqda".
Xəyalə Hənifə bildirib ki, sosial yardımın dayandırılması və məbləğinin dəyişdirilməsi:
Əvvəllər ailənin gəliri, əmlakı və ya tərkibində dəyişiklik baş verdikdə sosial yardım dayandırılır və yalnız ailənin müraciəti əsasında yenidən baxılırdı. "Yeni qaydalara görə isə bu dəyişikliklər elektron sistemdə avtomatik şəkildə nəzərə alınacaq, yardımın dayandırılması və ya məbləğinin dəyişdirilməsi müraciət tələb etmədən həyata keçiriləcək".
"Sosial yardımın təyini və imtinası:
Yardımın təyin olunması və ya imtina edilməsi barədə qərar qəbul edildikdə, ailənin təmsilçisinə rəsmi məlumat veriləcək.
Sosial yardımın ödənişi:
Sosial yardım aztəminatlı ailələrin adına açılmış bank kartları vasitəsilə ayda bir dəfə ödəniləcək və vətəndaşlar bu məbləği nağd şəkildə əldə edə biləcəklər".
Xumar Emilqızı
10:17 21.08.2025
Oxunuş sayı: 1802
