Cey Di Vens prezident seçkiləri ilə bağlı qərarını təxirə salıb
ABŞ-nin vitse-prezidenti Cey Di Vens 2028-ci ildə keçiriləcək prezident seçkilərində namizəd olub-olmayacağına dair yekun qərarını 2027-ci ilə saxlayıb. Onun qərarını gələn ilin yazının sonlarında ictimaiyyətə açıqlaya biləcəyi bildirilir.
Crossmedia.az xəbər verir ki, "Axios" nəşri bu barədə məlumat yayıb.
Məsələdən məlumatlı iki mənbənin bildirdiyinə görə, Vens prezident seçkilərində iştirakla bağlı hələ yekun qərar verməyib. Onun yaxın müşavirləri isə vitse-prezidentin namizədliyini irəli sürəcəyini gözləyirlər.
Nəşr qeyd edir ki, Respublikaçılar Partiyasının aralıq seçkilərində məğlubiyyətə uğraması Vensin siyasi planlarını mürəkkəbləşdirib.
Bundan başqa, vitse-prezidentin ABŞ Prezidenti Donald Trampın İrana qarşı hərbi əməliyyatlarını tənqid etməsi partiya daxilində fikir ayrılıqlarını gücləndirib.
Vens prezidentlik kampaniyasına erkən başlamağın Trampla münasibətlərində gərginlik yarada biləcəyindən də ehtiyat edir.
"Axios"un məlumatına əsasən, 2028-ci il prezident seçkilərində Respublikaçılar Partiyasından namizədlik uğrunda mübarizəyə senator Ted Kruz, dövlət katibi Marko Rubio və Florida qubernatoru Ron DeSantis də qoşula bilər.
Qeyd olunur ki, Vens hazırda Respublikaçılar Partiyasının prezidentliyə potensial namizədləri arasında ilkin sorğularda öndə gedən siyasətçilərdəndir.
Bununla belə, vitse-prezidentin ofisi onun gələcək siyasi planları ilə bağlı şərh verməkdən imtina edib.
10:35 16.11.2026
Oxunuş sayı: 105