Rusiya Naxçıvan və Türkiyə sərhədinə gedən dəmir yollarını bərpa etmək istəyir
Rusiya Ermənistanın iki dəmir yolu hissəsinin bərpası ilə bağlı təklifə cavabını gözləyir.
Crossmedia.az xəbər verir ki, Rusiya baş nazirinin müavini Aleksey Overçuk bu barədə açıqlama verib.
Onun sözlərinə görə, Moskva Yerəşaxdan Naxçıvan sərhədinə və Gümrüdən Türkiyə sərhədinə qədər olan iki dəmir yolu hissəsinin bərpası ilə bağlı Ermənistanın mövqeyini gözləyir.
Overçuk bildirib ki, Rusiya “Rusiya Dəmir Yolları”nın konsessiyasında olan hissələrin bərpasında iştirak etməyə və nəqliyyat əlaqələrinin təmin olunmasına kömək etməyə hazırdır.
O qeyd edib ki, bununla bağlı müvafiq qərarlar hələ yanvar ayında Rusiya Prezidenti səviyyəsində qəbul edilib. Overçukun sözlərinə görə, yaxın vaxtlarda keçiriləcək görüşlər bu məsələnin irəliləməsinə imkan yarada bilər.
Qeyd edək ki, 2008-ci ilin fevralında Ermənistanın dəmir yolu infrastrukturu 30 il müddətinə, əlavə 10 il uzadılma imkanı ilə “Cənubi Qafqaz Dəmir Yolları” şirkətinin konsessiya idarəçiliyinə verilib.
20:36 02.10.2026
Oxunuş sayı: 48
