Moskva Norveçdən rus gəmisinin qaytarılmasını istəyib
Rusiya Xarici İşlər Nazirliyinin rəsmi nümayəndəsi Mariya Zaxarova Norveçin Rusiyanın “Professor Molçanov” elmi-tədqiqat gəmisini həbs etməsini piratçılıq adlandırıb.
Crossmedia.az xəbər verir ki, “Lenta.ru” bu barədə məlumat yayıb.
Zaxarova brifinq zamanı bildirib ki, gəminin həbsinə dair qərardan məhkəmə qaydasında şikayət verilib. Məsələyə mahiyyəti üzrə baxılmasının oktyabr-noyabr aylarında keçirilməsi gözlənilir.
Diplomat vəziyyətin ən qısa zamanda həll ediləcəyinə və Rusiya gəmisinin maneəsiz şəkildə Rusiyaya qayıtmasının təmin olunacağına ümid etdiklərini deyib.
Zaxarovanın sözlərinə görə, “Professor Molçanov” Şpitsbergen arxipelaqındakı Rusiya yaşayış məntəqələrinin zəruri ehtiyaclarını təmin edən yeganə vasitədir.
O bildirib ki, gəminin həbs edilməsi Rusiyanın arxipelaqdakı mövcudluğunu məhdudlaşdırmaq cəhdidir və Rusiyanın qanuni hüquqlarının həyata keçirilməsinə mane olur.
Zaxarova həmçinin Norveçin 1920-ci il Şpitsbergen müqaviləsi üzrə öhdəliklərini pozduğunu iddia edib və bu addımı “piratçılığın növbəti təzahürü” adlandırıb.
Qeyd edək ki, Norveç daha əvvəl Ukrayna tərəfinin iddiası əsasında “Professor Molçanov” gəmisini həbs edib. Qərar “Naftoqaz” şirkətinin iddiası çərçivəsində Nord-Troms dairə məhkəməsinin göstərişi ilə qəbul edilib.
18:40 30.09.2026
Oxunuş sayı: 40
