10 il sonra evinə qayıdan pişik sahibələrini heyrətə gətirib
İngiltərədə Çarli adlı pişik itkin düşdükdən 10 il sonra ailəsinə qayıdıb.
Crossmedia.az xəbər verir ki, qeyri-adi hadisə barədə ˝BBC˝ məlumat yayıb.
Çarli 2016-cı ilin aprelində ailəsi Nyu-Bridcdən Kerfilid qraflığının Aberkarn şəhərinə köçdükdən sonra yoxa çıxıb. Üç yaşında olan pişik küçədə gəzməyə öyrəşmişdi. Lakin köçdükdən qısa müddət sonra gəzintiyə çıxıb və bir daha evə qayıtmayıb.
Pişiyin sahibləri Lüsi və Hanna Robertson aylarla Çarlini axtarıblar. Onlar yerli sakinlərdən soruşub, “Facebook”da elanlar yerləşdirib və daxil olan məlumatları araşdırıblar. Lakin pişiyin harada olduğu barədə dəqiq məlumat əldə edə bilməyiblər.
“Bu, çox ağrılı idi. Qorxurduq ki, onu avtomobil vurub və ya artıq həyatda deyil”, – deyə Lüsi bildirib.
İyulun 29-da isə ailəyə Aberkarn şəhərindəki baytarlıq klinikasından zəng gəlib. Klinikanın əməkdaşları mikroçip vasitəsilə pişiyin sahibini müəyyənləşdirə biliblər.
Məlum olub ki, Çarlini yerli sakin tapıb. Kişi bir neçə həftə ərzində kolluqların arasında yaşayan pişiyi görüb və onu sahibsiz hesab edərək yemləyib. Daha sonra heyvanı baytar klinikasına aparıb və mikroçip vasitəsilə sahibinin kimliyi müəyyən edilib.
Klinika əməkdaşları da Çarlinin 10 il ərzində evdən uzaqda olduğunu öyrəndikdə təəccübləniblər. Daha maraqlısı isə pişiyin vəziyyətinin olduqca yaxşı olması olub. Onun sağlam olduğu, tüklərinin normal vəziyyətdə qaldığı və baxımsız görünmədiyi bildirilib.
Ailə Çarlinin bu 10 il ərzində harada yaşadığını yəqin ki, heç vaxt öyrənə bilməyəcək. Bununla belə, sahibələrini ən çox təəccübləndirən məqam pişiyin onlarla görüş zamanı reaksiyası olub.
Lüsinin sözlərinə görə, Çarli onları dərhal tanıyıb. Pişik xarici görünüş baxımından da demək olar ki, dəyişməyib və köhnə fotolardakı kimi görünüb.
Hazırda ailə Çarlini digər ev heyvanları ilə birlikdə yaşamağa tədricən uyğunlaşdırır. Lüsi bu prosesin hələ davam etdiyini bildirib. Buna baxmayaraq, Çarlinin artıq yeməkdən və diqqətdən zövq aldığı, əvvəlki kimi mehriban olduğu qeyd edilir.
02:35 18.08.2026
Oxunuş sayı: 56
