20 Yanvar zamanı Azərbaycana kimlər rəhbərlik edirdi...
Hər il 20 yanvar qətliamının ildönümündə ictimaiyyət 1990-cı ildə Sovet qoşunlarının Azərbaycana kimin çağırdığını müzakirə edir. Bu sırada 1990-cı ildə Azərbaycan rəhbərliyində təmsil olunmuş Əbdürrəhman Vəzirov, Vaqif Hüseynov, Ayaz Mütəllibov, Artur Rasizadə və digərləri ittiham olunur.
Crossmedia.az xəbər verir ki, 20 Yanvar hadisələri zamanı Azərbaycan Nazirlər Sovetinin sədri olmuş Ayaz Mütəllibov isə hələ sağlığında Modern.az saytına müsahibəsində həmin vaxt ölkəni faktiki olaraq Moskvadan gələn Yevgeni Primakovun rəhbərliyi ilə yüksək vəzifəli şəxslərin idarə etdiyini demiş və 20 yanvar hadisələrinin baş verməsinə görə Sovet rəhbərliyini ittiham etmişdi. Mütəllibov müsahibədə hadisələr zamanı Azərbaycanın bütün rəhbərlərinin vəzifələrindən faktiki uzaqlaşdırıldığını söyləmişdi.
“Hətta Mərkəzi Komitənin qarşısındakı mitinq zamanı camaatın qarşısında çıxış edən Primakov etiraf etmişdi ki, qoşunlar Bakıya girəcək, dağılın!”, - Mütəllibov bildirmişdi.
Xatırladaq ki, 1990-cı il yanvarın 20-də sovet qoşunları Bakıda qətliam törədərkən Azərbaycanda aşağıdakı şəxslər rəhbər postları tuturdular:
Əbdürrəhman Vəzirov - Azərbaycan SSR Kommunist Partiyası Mərkəzi Komitəsinin birinci katibi;
Ayaz Mütəllibov - Azərbaycan SSR Nazirlər Sovetinin sədri;
Vaqif Hüseynov - Azərbaycan SSR Dövlət Təhlükəsizliyi Komitəsinin sədri;
Elmira Qafarova - Azərbaycan SSR Ali Sovetin sədri;
Artur Rasizadə - Azərbaycan SSR Nazirlər Soveti sədrinin birinci müavini;
Müzamil Abdullayev - Azərbaycan SSR Nazirlər Soveti sədrinin birinci müavini;
Viktor Polyaniçko - Azərbaycan SSR Kommunist Partiyası Mərkəzi Komitəsinin ikinci katibi;
Aydın Məmmədov - Azərbaycan SSR daxili işlər naziri;
Hüseynağa Sadıqov - Azərbaycan SSR xarici işlər naziri.(Modern.az)
18:07 20.01.2026
Oxunuş sayı: 1197
