Rusiya ilk dəfə qarşılıq almadan ABŞ məhbusunu azad etdi — səbəb nədir?
Rusiya Prezidenti Vladimir Putinin ABŞ-nin keçmiş dəniz piyadası Robert Gilmanı həbsdən azad etməsi diqqət çəkib.
Crossmedia.az xəbər verir ki, “Sky News” analitiki Ayvor Bennettin məlumatına görə, bu addım ABŞ Prezidenti Donald Trampa ünvanlanan hədiyyə xarakteri daşıyır və Moskva bunun qarşılığında Ukrayna müharibəsi ilə bağlı güzəştlər əldə etməyə çalışa bilər.
Adətən Rusiya və ABŞ arasında amerikalı məhbusların azad edilməsi qarşılıqlı mübadilə yolu ilə həyata keçirilir. Məsələn, 2024-cü ildə jurnalist Evan Qerşkoviç genişmiqyaslı məhbus mübadiləsi çərçivəsində azad edilmişdi. 2022-ci ildə isə basketbolçu Brittni Qrayner rusiyalı silah alverçisi Viktor Butla dəyişdirilmişdi.
Lakin Gilmanın azad edilməsi fərqli olub. Rusiya bu dəfə heç bir rusiyalı məhbus almadan ABŞ vətəndaşını sərbəst buraxıb.
Robert Gilman 2022-ci ildə rusiyalı polis əməkdaşına hücumda ittiham olunaraq həbs edilmiş və 4 ildən çox müddət cəza çəkmişdi. Onun azad edilməsi ABŞ rəsmilərinin bildirdiyinə görə, Putinin xoşməramlı addımı olub.
Analitik Ayvor Bennett qeyd edib ki, Moskvanın heç bir qarşılıq almadan belə addım atması qeyri-adi haldır.
“Bu, böyük ehtimalla Kremlin Ağ Evin dəstəyini qazanmaq və diplomatik dividendlər əldə etmək cəhdidir”, - deyə o bildirib.
Bennettin fikrincə, Rusiya hazırda Ukraynadakı müharibə fonunda artan problemlərlə üzləşir. Rusiyadakı obyektlərə dron hücumlarının çoxalması, neft emalı zavodlarına zərbələr və iqtisadi çətinliklər Moskvanın vəziyyətinə təsir edir.
Analitik bildirib ki, ABŞ vasitəçiliyi ilə aparılan sülh danışıqları da hazırda dayanmış vəziyyətdədir. Eyni zamanda, Donald Trampın Ukrayna Prezidenti Volodimir Zelenski ilə yaxınlaşdığı və Vaşinqtonun Kiyevə daha çox meyl etdiyi qeyd olunur.
“Gilmanın azad edilməsi Moskvanın münasibətləri yenidən qurmaq və vəziyyəti öz xeyrinə dəyişmək cəhdidir. Bu, hələlik hədiyyədir, lakin Rusiya şübhəsiz ki, qarşılığında nəsə əldə etməyə ümid edir”, - Bennett vurğulayıb.
23:42 12.08.2026
Oxunuş sayı: 44
