Kolleclərə ixtisas seçimi başlayır: Namizədlər nələrə diqqət etməlidirlər?
Avqustun 3-dən 9-dək 9 illik təhsil bazasında kolleclərə ixtisas seçimi aparılacaq. Mütəxəssislər bildirirlər ki, seçim zamanı yalnız keçid ballarına deyil, plan yerlərinə, əmək bazarının tələbatına və gələcək təhsil imkanlarına da diqqət yetirilməlidir. Təhsil eksperti Cahid İmanlının sözlərinə görə, düzgün seçim etmək üçün DİM-in rəsmi nəşrlərindən kompleks şəkildə istifadə olunması vacibdir.
Mövzu ilə bağlı Crossmedia.az-a danışan təhsil eksperti Cahid İmanlı bildirib ki, ixtisas seçimində hökmən DİM-in çap etdirdiyi "Abituriyent 3" jurnalı ilə yanaşı, keçən il formalaşan "Keçid balları" jurnalı və keçən ilki "Abituriyent'" hurnalından da istifadə etmək tövsiyə olunur. Öncəliklə qeyd edim ki, bu il DİM "Abituriyent" jurnalında ciddi dəyişiklik edib. Belə ki, ilk dəfə olaraq jurnalda kolleclər və ixtisaslar üzrə Azərbaycan və rus dili bölmələri birləşdirilmiş və Azərbaycan dilində verilmişdir. Azərbaycan və rus dili bölmələrinin abituriyentləri buna fikir verməlidirlər. Maraqlıdır ki, jurnalda həm Azərbaycan bölməsi, həm rus bölməsi, həm də rus və Azərbaycan dillərində birgə seçim aparılan ixtisaslar var. Rus bölməsinin abituriyentlərinin nəzərinə çatdırıram ki, birgə aparılan ixtisaslarda tədris yalnız Azərbaycan dilində olacaq".
O, bildirib ki, abituriyentlər seçim zamanı öz mövcud balı üzərindən proqnozlaşma etməlidirlər: "Bu zaman sual oluna bilər ki, bəs ixtisaslar üzrə balların qalxıb, yaxud enməsini necə bilmək olar? İlk növbədə abituriyentlər bu ilki və keçən ilki plan yerlərini və sənəd verənlərin sayını bilməlidirlər. Müvafiq olaraq artım və azalma balların da qalxıb-enməsinə təsir edir.
İkincisi, seçəcəyi ixtisaslar üzrə plan yerlərinin sayına baxmalı və həmin ixtisasın hansı kollecdə bağlanmasına və ya yenisinin açılmasına diqqət etməlidirlər.
Ən əsası isə mövcud əmək bazarında tələbat nəzərə alınmalı və gələcəkdə o ixtisas üzrə ali təhsilin mümkün olub-olmaması, eləcə də hansı sahələr üzrə əmək bazarına çıxa biləcəyi araşdırılmalıdır".
Zeynəb Həsən
15:30 31.07.2026
Oxunuş sayı: 64
