Davudoğlu siyasətdən gedir: Türkiyə daxilində nə baş verəcək?
Türkiyə siyasətində bir dövr rəsmən başa çatdı: "Gələcək" Partiyasının sədri Əhməd Davudoğlu aktiv siyasətdən çəkildiyini və partiyanın fəaliyyətini dayandırdığını bəyan edib. Böyük iddialarla səhnəyə çıxan, lakin seçkilərdə gözlənilən ictimai dəstəyi qazana bilməyən partiyanın bu gedişi daxili siyasətdə kəskin güc dəyişikliyi yaratmasa da, mühafizəkar müxalifət cəbhəsində yeni bir reallıq formalaşdırır. Uzun illər xarici işlər naziri və baş nazir postlarını tutmuş, "strateji dərinlik" doktrinası ilə xarici siyasətdə dərin izlər buraxmış Davudoğlunun gedişi simvolik bir mərhələnin sonudur. Lakin seçici kütləsini artıq Hakim Ədalət və İnkişaf (AKP) və digər ana müxalifət partiyalarına kaptıran "Gələcək" Partiyasının səhnədən çəkilməsi rəqabəti daha da konkretləşdirir; kiçik aktoların sıradan çıxması ilə növbəti seçki maratonunda mübarizənin birbaşa əsas oyunçular arasında keçəcəyi gözlənilir. Məsələ ilə bağlı "Ədalət" Partiyasının sədri Mütəllim Rəhimli Crossmedia.az-a açıqlama verib.
"Əhməd Davudoğlunun siyasətdən getməsi və "Gələcək" Partiyasının fəaliyyətini dayandırması Türkiyə siyasətində kiçik zaman müddətində diqqətçəkən hadisə ola bilər. Lakin bu hadisənin siyasi balansı ciddi şəkildə dəyişəcəyini gözləmək olmaz. Çünki yarandığı vaxtdan "Gələcək" Partiyası lazımi ictimai dəstəyi qazana bilmədi və nə parlamentdə, nə də bələdiyyə seçkilərində həlledici siyasi gücə çevrilmədi.
Bununla belə, Davudoğlu sıradan bir siyasətçi deyil. O, uzun illər Türkiyənin xarici siyasətinin formalaşmasında mühüm rol oynayıb, xarici işlər naziri və baş nazir olub".
Ekspert qeyd edib ki, o, xüsusilə, “strateji dərinlik” konsepsiyası və Türkiyənin regional güc kimi mövqeyinin möhkəmləndirilməsi istiqamətindəki fəaliyyəti ölkənin xarici siyasət tarixində mühüm yer tutur:
"Bu baxımdan onun aktiv siyasətdən çəkilməsi bir dövrün başa çatması kimi qiymətləndirilə bilər. Daxili siyasət baxımından isə yaranacaq boşluğun böyük olacağı ehtimalı yoxdur. Çünki Davudoğlunun seçici bazasının əhəmiyyətli hissəsi son illərdə ya yenidən Ədalət və İnkişaf Partiyasına qayıdıb, ya da fərqli müxalif qüvvələrə yönəlib. Bu səbəbdən Gələcək Partiyasının siyasi səhnədən çəkilməsi seçici xəritəsində ciddi dəyişiklik yaratmayacaq.
Bu hadisə Türkiyə siyasətində müxalif düşərgənin yenidən formalaşması prosesində rol oynaya bilər. Müxalifət daxilində kiçik partiyaların sıradan çıxması siyasi rəqabətin əsas oyunçular arasına keçməsini şərtləndirəcək. Bu isə növbəti seçkilər ərəfəsində yeni siyasi ittifaqların və əməkdaşlıq modellərinin meydana çıxması deməkdir".
Turqut Ansari
16:00 31.07.2026
Oxunuş sayı: 61
