Müharibələr ərzaq böhranını dərinləşdirir: dünya üçün yeni sınaq başlayır
Dünya enerji bazarlarında yaranan münaqişələr və tədarük problemləri yanacaq, gübrə və ərzaq qiymətlərinin artmasına səbəb olaraq daha milyonlarla insanı aclıq riski ilə qarşı-qarşıya qoya bilər.
Crossmedia.az bu barədə xarici mediaya istinadən xəbər verir ki, bunu Romada yerləşən Beynəlxalq Kənd Təsərrüfatının İnkişafı Fondunun (IFAD) rəhbəri Alvaro Lario açıqlayıb.
Onun sözləri BMT-nin ərzaq təhlükəsizliyi ilə bağlı yeni hesabatının dərc olunmasından sonra səslənib. Hesabatda bildirilir ki, dünyada aclıqla mübarizədə əldə olunan irəliləyiş hələ də çox kövrək vəziyyətdədir.
BMT-nin məlumatına görə, son illərdə qlobal aclıq səviyyəsində cüzi azalma müşahidə olunub. Lakin proqnozlara əsasən, 2030-cu ilə qədər 500 milyondan çox insan hələ də xroniki qidalanma problemi ilə üzləşə bilər. Əsas yük isə Afrika ölkələrinin üzərinə düşəcək.
Münaqişələr aclığın əsas səbəblərindən biridir
IFAD rəhbəri bildirib ki, münaqişələr qlobal miqyasda aclığın azalmasına mane olan əsas amillərdən biri olaraq qalır.
Onun sözlərinə görə, müharibələr və geosiyasi gərginliklər gəmiçilik, enerji resurslarının və kənd təsərrüfatı üçün zəruri məhsulların tədarükünü pozur. Bu isə onsuz da inflyasiyadan zərər görmüş ərzaq istehsalı və çatdırılma zəncirində qiymətlərin daha da artmasına gətirib çıxarır.
Lario vurğulayıb ki, aclıq və silahlı qarşıdurmalar bir-birini gücləndirərək sabitlik əldə olunmadan çıxılması çətin olan qapalı dövrə yaradır.
Yanacağın bahalaşması fermerlərə ağır zərbə vurur
Enerji daşıyıcılarının qiymətinin artması artıq gübrələrin və ümumilikdə kənd təsərrüfatı istehsalının bahalaşmasına təsir göstərir.
Xüsusilə kiçik fermer təsərrüfatları bu vəziyyətdən daha çox zərər görür. Onların bir çoxu suvarma sistemləri, məhsul yığımı və məhsulların bazarlara daşınması üçün dizel yanacağından asılıdır.
Yanacağın bahalaşması birbaşa istehsal xərclərini artırır və nəticədə ərzaq qiymətlərinin daha da yüksəlməsinə səbəb olur.
22:32 21.07.2026
Oxunuş sayı: 65
