Tramp Avropadakı müttəfiqlərini itirir? – Böyük Britaniyadan Putinə QƏRAR
ABŞ-də keçirilən aralıq seçkilərində Respublikaçılar Partiyasının məğlubiyyətindən sonra Prezident Donald Trampın Avropadakı siyasi müttəfiqlərinin mövqelərində dəyişikliklər müşahidə olunur. Böyük Britaniya isə Rusiya Prezidenti Vladimir Putinin 2027-ci ildə Mançesterdə keçiriləcək G20 sammitində iştirak etməyəcəyini açıqlayıb.
Crossmedia.az xəbər verir ki, Türkiyənin “Haber Global” nəşri bu barədə məlumat yayıb.
Noyabrın 3-də ABŞ-də keçirilən seçkilərdə Demokratlar Partiyası Konqresin hər iki palatasında çoxluğu qazanıb. Respublikaçıların məğlubiyyətində İranla müharibə və yaşayış xərclərinin artması mühüm amillər kimi göstərilir.
Türkiyə nəşrinin təhlilinə görə, seçkilərin nəticələri Trampın Avropadakı siyasi müttəfiqləri ilə münasibətlərinə də təsir göstərməyə başlayıb.
Fransa, Almaniya, İtaliya, İspaniya və Böyük Britaniyadakı bəzi ifrat sağçı siyasi qüvvələrin İran müharibəsi və iqtisadi problemlərlə bağlı tənqidi mövqeləri diqqət çəkir.
Böyük Britaniya Putinin G20 sammitində iştirakına qarşı çıxıb.
Böyük Britaniyanın Baş naziri Endi Börnhem 2027-ci ilin noyabrında Mançesterdə keçiriləcək G20 sammitində Rusiya Prezidenti Vladimir Putinin iştirak etməyəcəyini bildirib.
Börnhem “The Economist” nəşrinə açıqlamasında Putinə qarşı qüvvədə olan Britaniya sanksiyalarını əsas gətirib.
Baş nazir qeyd edib ki, Rusiya G20-nin üzvü olaraq qalsa da, mövcud sanksiyalar Putinin sammitdə iştirakına mane olacaq.
Bu mövqe ABŞ administrasiyasının yanaşmasından fərqlənir. Vaşinqton Putini dekabrda Mayamidə keçiriləcək G20 sammitinə dəvət edib.
Böyük Britaniya hökumətinin rəsmi məlumatına əsasən, 2027-ci il G20 Liderlər Sammiti noyabrın 27–28-də Mançesterdə təşkil olunacaq.
Beləliklə, ABŞ və Böyük Britaniyanın Rusiya liderinin beynəlxalq sammitlərdə iştirakı məsələsinə fərqli yanaşmaları Vaşinqtonla London arasındakı xarici siyasət mövqelərində fikir ayrılıqlarını üzə çıxarır.
07:00 07.11.2026
Oxunuş sayı: 24
