Ukraynalı jurnalistin Azərbaycan Prezidenti haqqında dedikləri gündəm oldu: Kimə, hansı mesajlar verildi?
Azərbaycan-Ukrayna münasibətləri və işğaldan azad olunmuş ərazilərdə aparılan bərpa-quruculuq işləri tanınmış ukraynalı jurnalist Dmitri Qordonun diqqət mərkəzində olub. Şuşada keçirilən Qlobal Media Forumu çərçivəsində çıxış edən jurnalist Azərbaycan və Prezident İlham Əliyev haqqında səsləndirdiyi fikirlərlə diqqət çəkib. O, forum zamanı göstərilən yüksək qonaqpərvərliyə görə Azərbaycana minnətdarlığını ifadə edib və Prezident İlham Əliyevə xüsusi təşəkkürünü çatdırıb. Qordon Azərbaycan Prezidentinin Ukraynaya və ukraynalılara münasibətini yüksək qiymətləndirərək, ölkənin son illərdə əldə etdiyi uğurları vurğulayıb. Jurnalistin sözlərinə görə, Azərbaycanın işğaldan azad edilmiş ərazilərdə qısa müddətdə həyata keçirdiyi genişmiqyaslı bərpa və quruculuq işləri Ukrayna üçün nümunə ola bilər.
Qordonun dedikləri barədə Crossmedia.az-a açıqlama verən Azərbaycan Respublikasının Xalq Şairi, Vətəndaş Həmrəyliyi partiyasının sədri Sabir Rüstəmxanlı bildirib ki, Dmitri Qordon Qarabağa əvvəlki səfərində də Prezident İlham Əliyevin mövqeyini, onun çıxışlarını, Ukrayna-Rusiya savaşına münasibətini, bu problemin hansı beynəlxalq hüquq çərçivəsində və Ukraynanın ərazi bütövlüyünün qorunması şərti ilə həll olunmalı olduğunu dinləmiş və buna son dərəcə yüksək qiymət vermişdi:
"Bu barədə onun televiziyada açıqlamaları var və həmin açıqlamalarda Prezidentin ümumiyyətlə dünya səviyyəli bir lider kimi proseslərə münasibətini böyük məhəbbət və hörmətlə xatırlatmış, təhlil etmişdi. Bu il də Azərbaycana və Qarabağa həmin sevgi ilə, ilk görüşün təsiri altında gəlib. Sonrakı açıqlaması da göstərir ki, Qordon Qarabağda gedən prosesləri diqqətlə izləyir. Bu dəfə gəlib həm Şuşada, həm Xankəndidə, ümumiyyətlə, azad olunmuş ərazilərdə görülən quruculuq işlərini müşahidə edib. Hər halda, hamısını görmək imkanı olmayıb, amma qismən görüb və qısa müddətdə Azərbaycanın apardığı işlərin əhəmiyyətini, mənasını olduqca obyektiv şəkildə ifadə edib. Bizim bəzi jurnalistlərimizdən, gedən prosesləri yalnız siyasi ideallarla qiymətləndirən jurnalistlərimizdən və yaxud siyasətçilərimizdən fərqli olaraq, bu prosesləri obyektiv qiymətləndirib. Qısa müddətdə Azərbaycan, türk respublikalarının, türk dövlətlərinin, qardaş dövlətlərin oradakı yardımlarını istisna etsək, tikilən məktəbləri və mədəniyyət mərkəzlərini nəzərə almasaq, qalan işlərin hamısını heç bir kənar yardım almadan özü edir. 30 il torpaqları işğal altında qalan, bütün şəhərləri və kəndləri dağıdılan Azərbaycan bu işləri heç bir beynəlxalq dəstək almadan həyata keçirir. Bu 30 illik işğalçılıq siyasətini aparan, Azərbaycana qarşı düşmənçilik edən, 1 milyon insanı 30 il çətin şəraitdə yaşamağa məcbur edən Ermənistan isə bu gün dünyadan, Avropadan çoxlu maliyyə dəstəyi alır. Çünki guya dağıdılan Ermənistan imiş. Azərbaycana isə belə bir dəstək gəlmir. Bu ikili standartı həmişə görmüşük, bəlkə bundan sonra da davam edəcək".
S.Rüstəmxanlının sözlərinə görə, belə bir şəraitdə Azərbaycan öz iradəsi və imkanları ilə dağıdılmış torpaqları, kəndləri və şəhərləri bərpa edir, mina ilə çirklənmiş ərazilərin təmizlənməsi ilə məşğuldur, bütün infrastruktur yenidən qurulur:
"Qarabağa gələn qonaqların hamısı bunu görür. Hamısı bu işin genişliyini və mahiyyətini tam dərk etməsə də, Ukraynanın vətəndaşı kimi, kəndləri və şəhərləri dağıdılan, işğal altında olan bir ölkənin nümayəndəsi kimi Azərbaycanda gedən bu prosesləri görür. Ona görə də deyir ki, Ukrayna bu təcrübədən öyrənməlidir. Çünki Ukrayna da azad olunan şəhər və kəndlərini hökmən quracaq, abadlaşdıracaq. Təbii ki, ona beynəlxalq dəstək də güclü olacaq. Amma hər halda Azərbaycanın təcrübəsi doğrudan da onlara lazım olacaq. Ona görə bu acı təcrübədir. Kim istəyər ki, torpaqları dağılsın, kəndləri dağılsın və gəlib bu təcrübədən istifadə edərək onları yenidən qursun? Nə qədər yeni salınan şəhərlərimiz olsa da, nə qədər yeni layihələr həyata keçirilsə də, yeni yollar salınsa da, təbii ki, o yerlərin köhnə havasını, o torpaqlarda yaşamış insanların xatirələrini, onların ürəyindəki boşluğu və həsrəti heç vaxt doldurmayacaq. Onlar həmişə köhnə yurdlarının həsrətini çəkəcəklər. Amma az zaman keçəndən sonra bütün bu yeni şəhər və kəndlər artıq, belə deyək ki, gələcək Qarabağın yeni modeli, yeni üslubu olaraq hər kəsi razı salacaq. Belə bir proses gedir və bunu xarici jurnalistlər, gələn qonaqlar, politoloqlar görürlər. Ürəyində az da olsa ədalət hissi olanların hamısı bunu dəyərləndirirlər".
Turqut Ansari
13:00 21.07.2026
Oxunuş sayı: 71
