KİV: İranla müharibədə 400-dən çox ABŞ hərbçisi yaralanıb
ABŞ-nin İranla müharibəsi zamanı 400-dən çox amerikalı hərbçi yaralanıb, 17 hərbçi isə həlak olub.
Crossmedia.az xəbər verir ki, bu barədə "The New York Times" məlumat yayıb.
Nəşrin yazdığına görə, Pentaqon İordaniyadakı ABŞ hərbi bazalarına İran tərəfindən endirilən və iki amerikalı hərbçinin ölümü ilə nəticələnən hücumdan bir həftə əvvəl baş vermiş daha üç hücum barədə məlumatı açıqlamayıb. Həmin hücumlar zamanı onlarla hərbçinin yaralandığı, bir neçə helikopterin zədələndiyi bildirilir.
Pentaqon isə məlumatın gizli saxlanılmasını əməliyyat təhlükəsizliyi ilə izah edib. Bildirilib ki, bu addım İranın mümkün növbəti hücumlarının effektivliyini artıracaq məlumatların qarşı tərəfə ötürülməsinin qarşısını almaq məqsədi daşıyır. Eyni səbəbdən ABŞ Mərkəzi Komandanlığı (CENTCOM) da İrana məxsus vurulan obyektlərin sayı barədə məlumat verməyi dayandırıb.
"The New York Times"ın istinad etdiyi CENTCOM məlumatına əsasən, müharibənin əvvəlindən indiyədək 400-dən çox ABŞ hərbçisi yaralanıb. ABŞ və İsrailin fevralın 28-dən İrana qarşı birgə əməliyyatları başlayandan bəri isə 17 amerikalı hərbçi həlak olub.
17:51 20.07.2026
Oxunuş sayı: 61
