Xarici xəbərlər

Aİ-də Rusiyaya qarşı yeni sanksiyalar paketi üzrə razılıq əldə olunmayıb

Avropa İttifaqında (Aİ) Rusiyaya qarşı növbəti sanksiyalar paketinin qəbulu ilə bağlı danışıqlar dalana dirənib.

Crossmedia.az xəbər verir ki, bu barədə "Financial Times" məlumat yayıb.

Nəşrin yazdığına görə, Avstriya və Yunanıstan sənədin qəbuluna veto qoyub. Almaniya, Fransa, İtaliya və Portuqaliya isə bəzi müddəaların yumşaldılmasını və ya öz iqtisadiyyatları üçün istisnaların tətbiqini tələb ediblər.

Məlumata əsasən, ən böyük narazılıq Rusiyadan mayeləşdirilmiş təbii qazın (LNG) üçüncü ölkələrə daşınmasının qadağan edilməsi təklifi ilə bağlı yaranıb. Yunanıstan bu təşəbbüsə qəti şəkildə qarşı çıxaraq bildirib ki, belə məhdudiyyət ölkənin gəmiçilik sektoruna ciddi zərər vura bilər. Afina hesab edir ki, bu halda yunan gəmiçilik şirkətləri bazarda Çin, Yaponiya və ABŞ rəqiblərinə uduza bilər.

Almaniya və Portuqaliya isə Rusiyadan balıq idxalına məhdudiyyətlərin tətbiqinə etiraz edib. Hər iki ölkə bu addımın həm istehlakçılar, həm də emal sənayesi üçün mənfi nəticələr doğuracağını düşünür.

🖨 Çap et

13:54 20.07.2026

Oxunuş sayı: 60