Ukrayna kəşfiyyatı: Rusiya işğal olunmuş ərazilərin demoqrafik tərkibini məqsədli şəkildə dəyişir
Rusiya işğal altında olan Ukrayna ərazilərində etnik tərkibi məqsədli şəkildə dəyişdirir və yerli əhalini köçkünlərlə əvəz etməyə çalışır.
Crossmedia.az xəbər verir ki, bu barədə Ukrayna Müdafiə Nazirliyinin Baş Kəşfiyyat İdarəsi məlumat yayıb.
Məlumata görə, son on il ərzində işğal olunmuş Donbasda əhalinin sayı 7,3 milyondan təxminən 3,75 milyon nəfərə qədər azalıb.
Bildirilib ki, 2026-cı ilin iyul ayına olan məlumata əsasən, işğal altındakı Krım və Sevastopola 200-300 min etnik rus köçürülüb. İddia olunur ki, Rusiya 2042-ci ilədək Sevastopola daha 130 min nəfərin yerləşdirilməsini planlaşdırır.
Qurumun məlumatında qeyd edilir ki, işğal olunmuş Donetsk, Luqansk, Zaporojye və Xerson vilayətlərində 2024-cü ilədək Rusiyadan təxminən 200 min köçkün, həmçinin Mərkəzi Asiya və Qafqazdan 100 minə yaxın əmək miqrantı yerləşdirilib.
Bildirilir ki, yalnız 2026-cı ilin əvvəlindən Donetsk vilayətinin işğal altında olan hissəsində 10 minə yaxın yeni əmək miqrantı qeydiyyata alınıb.
İdarənin iddiasına görə, Rusiyadan işğal olunmuş ərazilərə köçən şəxslərə ikiqat əməkhaqqı, kirayə haqqının ödənilməsi, gündəlik müavinət və digər maliyyə güzəştləri təqdim olunur. Bundan başqa, onlara əvvəllər Ukrayna vətəndaşlarına məxsus olmuş torpaq sahələri və yaşayış evləri verilir.
Ukrayna kəşfiyyatı hesab edir ki, bu siyasətin məqsədi işğal olunmuş ərazilərdə Ukrayna kimliyini zəiflətmək və bölgələrin demoqrafik strukturunu dəyişdirməkdir.
11:48 20.07.2026
Oxunuş sayı: 67
