Arxeologiya və Antropologiya İnstitutunda yeni laboratoriya yaradılacaq
Fiziki antropologiya sahəsində çalışan gənc mütəxəssislər bu gün aktiv şəkildə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının xətti ilə çalışırlar. Onların bu sahədəki fəaliyyəti, peşəkar mütəxəssis səviyyəsinə çatması üçün böyük təcrübə qazanmasına şərait yaradıb. Bu gün Azərbaycanda da faktiki fiziki antropologiya sahəsinin aktuallaşması məsələsi gündəmə gəlib.
Crossmedia.az xəbər verir ki, bunu Azərbaycan Milli Elmlər Akademiyasının Arxeologiya və Antropologiya İnstitutunun direktoru, tarix üzrə fəlsəfə doktoru, dosent Fərhad Quliyev iyunun 30-da Bakıda “İtkin düşmüş şəxslər məsələsinin həllində müasir yanaşmalar və əməkdaşlığın gücləndirilməsi” mövzusunda keçirilən beynəlxalq konfransda çıxış edərkən deyib.
Direktor fiziki antropologiyanın çox vacib bir sahə olduğunu qeyd edib. O, bildirib ki, komissiyanın xətti ilə çalışmaq gənclərimizin müəyyən biliklərə yiyələnməsinə şərait yaradıb: "Ölkəmizdə fəaliyyət göstərən Genetik Araşdırmalar Mərkəzinin laboratoriyası var. Çox möhtəşəm bir laboratoriyadır. Amma bizim institut da, eyni zamanda, fiziki antropologiya sahəsində yeni laboratoriya yaratmağı planlaşdırır. Bu, insan qalıqlarının ilkin mərhələdə, qazıntı sahəsində aşkar olunan dövrdə həmin mühitdə araşdırılması sahəsidir. Yəni ilk olaraq birinci laborator analizlərdən əvvəl həmin şəraitdə, mühitdə aşkar olunan qalıqların yerindəcə öyrənilməsi, patoloji tədqiqatların aparılması çox vacibdir. Biz bu sahəni inkişaf etdiririk".(AZƏRTAC)
13:36 30.06.2026
Oxunuş sayı: 42
