ABŞ Sibirdəki müəmmalı ölümün araşdırılmasını diqqətdə saxlayır
ABŞ dövlət katibi Marko Rubio Rusiyanı Sibirdə vəba araşdırma mərkəzində çalışan laboratoriya əməkdaşının ölümü ilə bağlı daha ətraflı məlumat açıqlamağa çağırıb.
Crossmedia.az xəbər verir ki, “BBC” bu barədə məlumat yayıb.
Rubio 28 yaşlı qadının ölümünün səbəbləri ilə bağlı Rusiyanın dünyaya daha çox məlumat verməsinin vacib olduğunu bildirib. O, ABŞ-ın vəziyyəti “çox yaxından, saatbasaat” izlədiyini deyib.
Hadisə ilə bağlı müxtəlif ehtimallar irəli sürülüb. Rusiya mətbuatında Darya Şipilova kimi təqdim olunan laboratoriya əməkdaşının ölümündən sonra Sibirin İrkutsk vilayətində təxminən 200 nəfərin müşahidə altına alındığı barədə məlumat yayılıb.
Bəzi təsdiqlənməmiş məlumatlarda qadının vəba törədicisi olan nümunənin yerləşdiyi sınaq şüşəsini sındırdıqdan və ya vəbanın təbii şəkildə yayıldığı əraziyə səfər etdikdən sonra xəstələndiyi iddia olunub.
Lakin Rusiya rəsmiləri bu məlumatları təkzib edib. Ölkənin istehlakçı hüquqlarının və insan rifahının müdafiəsi üzrə nəzarət qurumu “Rospotrebnadzor” qadının “etiologiyası müəyyən edilməyən pnevmoniya”dan öldüyünü açıqlayıb.
Ümumdünya Səhiyyə Təşkilatının sözçüsü Kristian Lindmeyerin çərşənbə axşamı oxuduğu bəyanatda Rusiya İrkutsk şəhərində bu təhlükəli xəstəliklə bağlı heç bir hal qeydə alınmadığını bildirib.
Bəyanatda həmçinin qeyd olunub ki, mərhumla təmasda olan bütün şəxslər müəyyənləşdirilib və onların sağlamlıq vəziyyəti izlənilir. İndiyədək həmin şəxslərdən heç birində xəstəlik əlaməti aşkarlanmayıb.
Hadisə ilə bağlı yayılan məlumatlar fonunda Rusiya və ABŞ arasında da müzakirələr başlayıb. Tərəflər xəstəliyin Rusiyadan kənara yayılma ehtimalı ilə bağlı suallar səsləndiriblər.
06:20 07.10.2026
Oxunuş sayı: 65
