Azərbaycanda məlumat təhlükəsizliyi güclənir — bəs sistem buna hazırdımı?
Azərbaycanda internet provayderləri üçün məlumat təhlükəsizliyi tələblərinin sərtləşdirilməsi ölkədə fərdi məlumatların qorunmasına yönəlmiş ciddi addım kimi qiymətləndirilir.
Bu kontekstdə əsas sual yaranır: fərdi məlumatların məxfiliyinin pozulması halları baş verdiyi anda operativ şəkildə aidiyyəti qurumlara çatdırıla bilirmi və mövcud texniki infrastruktur bu funksiyanı yerinə yetirmək üçün yetərlidirmi?
Bu məsələnin dəqiq qiymətləndirilməsi məlumat təhlükəsizliyinin effektivliyini müəyyən etmək baxımından vacibdir.
Mövzu ilə bağlı İT eksperti Eyvaz Kərimov Crossmedia.az-a açıqlama verib:
"Azərbaycanda internet provayderləri üçün məlumat təhlükəsizliyi tələblərinin sərtləşdirilməsi müsbət və vaxtında atılmış addımdır. Lakin fərdi məlumatların məxfiliyinin pozulması hallarının operativ şəkildə aşkarlanması və bildirilməsi üçün mövcud texniki infrastrukturun tam yetərli olduğunu demək hələ tezdir.
Hazırda böyük provayderlərdə müəyyən monitorinq sistemləri, loglama və insidentlərin izlənməsi mexanizmləri mövcuddur. Ancaq bu imkanlar bütün bazar iştirakçıları üzrə eyni səviyyədə deyil.
Xüsusilə, kiçik və orta provayderlərdə SIEM, DLP və real-time insident cavab sistemlərinin tətbiqi ya zəifdir, ya da ümumiyyətlə yoxdur".
Ekspert əlavə edib ki, digər tərəfdən, operativ bildiriş yalnız texniki məsələ deyil — bu, həm də təşkilati və hüquqi proseslərin düzgün qurulmasını tələb edir:
"Hadisələrin vaxtında aşkarlanması üçün 24/7 işləyən SOC (Security Operations Center) strukturlarına, avtomatlaşdırılmış alert mexanizmlərinə və standartlaşdırılmış insident cavab prosedurlarına ehtiyac var.
Azərbaycanda bu istiqamətdə inkişaf müşahidə olunsa da, vahid standartların tətbiqi, audit mexanizmlərinin gücləndirilməsi və provayderlər arasında minimal təhlükəsizlik tələblərinin məcburi hala gətirilməsi vacibdir.
Nəticə olaraq demək olar ki, mövcud infrastruktur müəyyən səviyyədə imkan yaratsa da, operativ və tam effektiv bildiriş sistemi üçün həm texniki, həm də institusional baxımdan əlavə inkişaflara ehtiyac var".
Ayhan
11:15 11.04.2026
Oxunuş sayı: 249
