Trampa İrana yenidən hücum etmək üçün təzyiqlər artır
ABŞ Prezidenti Donald Tramp administrasiya daxilində İrana qarşı genişmiqyaslı hərbi əməliyyatların bərpası ilə bağlı təzyiqlərlə üzləşib.
Crossmedia.az xəbər verir ki, ABŞ-nin “NBC News” telekanalı iki amerikalı rəsmiyə istinadən bu barədə məlumat yayıb.
Məlumata görə, Trampın bəzi müşavirləri İrana qarşı hərbi əməliyyatların yenidən başlanılması üçün vaxtın məhdud olduğunu düşünürlər.
Onlar 2027-ci ilin yanvarında Demokratlar Partiyasının nəzarətinə keçəcək Konqres fəaliyyətə başlamazdan əvvəl hərbi əməliyyatların bərpasını təklif edirlər.
Müşavirlərin fikrincə, yeni Konqres administrasiyanın İrana qarşı hərbi addımlarına nəzarəti gücləndirə, araşdırmalar başlada və hərbi əməliyyatların məhdudlaşdırılması istiqamətində qərarlar qəbul edə bilər.
“NBC News”un məlumatına əsasən, ABŞ müdafiə naziri Pit Heqset İrana qarşı hərbi zərbələrin bərpasını dəstəkləyən əsas rəsmilərdən biridir.
Lakin Trampın digər müşavirləri hərbi əməliyyatların yenidən başlanmasının Tehranla aparılan diplomatik danışıqları poza biləcəyi barədə xəbərdarlıq edirlər.
Beləliklə, ABŞ administrasiyası daxilində İranla bağlı hərbi və diplomatik yanaşmalar arasında fikir ayrılığı yaranıb.
Məlumata görə, noyabrın 5-də Tramp milli təhlükəsizlik üzrə müşavirləri ilə İran məsələsinə dair toplantı keçirib. Görüşdə hərbi əməliyyatların mümkün bərpası da daxil olmaqla müxtəlif variantlar nəzərdən keçirilib.
ABŞ liderinin qarşısında İrana yeni hərbi zərbələr endirmək, Tehranla razılaşma əldə etmək və ya mövcud iqtisadi təzyiqləri davam etdirmək kimi seçimlər olduğu bildirilir.
Donald Tramp hələlik İrana qarşı genişmiqyaslı hərbi əməliyyatların bərpasına dair yekun qərar qəbul etməyib.
13:57 07.11.2026
Oxunuş sayı: 45
