Cəmiyyət

Xərçəng xəstələrinin müalicəsi sığortaya daxil ediləcək? - AÇIQLAMA

Onkoloji xəstəliklər müasir səhiyyənin qarşısında duran ən ciddi problemlərdən biridir. Bu diaqnozla üzləşən insan yalnız sağlamlığı və həyatı uğrunda mübarizə aparmır, eyni zamanda uzunmüddətli və çox zaman böyük maliyyə vəsaiti tələb edən müalicə prosesinə də başlayır. Müayinə, laborator analizlər, əməliyyat, kimyaterapiya, şüa terapiyası və dərman preparatları xəstənin və ailəsinin üzərinə ciddi maddi yük qoya bilir. Bəzi hallarda müalicənin davamlılığı məhz maliyyə imkanlarından asılı vəziyyətə düşür.

Xərçəng xəstəliklərinin müalicəsində vaxt amili də xüsusi əhəmiyyət daşıyır. Xəstəliyin erkən aşkarlanması, düzgün diaqnozun qoyulması və müalicəyə vaxtında başlanması sağalma və xəstəliyə nəzarət imkanlarını artıra bilər. Lakin tibbi xidmətlərin və dərmanların qiyməti yüksək olduqda, bəzi insanlar müayinələri gecikdirir, müalicəni yarımçıq saxlayır və ya zəruri preparatları əldə etməkdə çətinlik çəkirlər. Bu isə problemin yalnız tibbi deyil, həm də sosial və iqtisadi xarakter daşıdığını göstərir.

Məhz buna görə onkoloji xəstəliklərin icbari tibbi sığorta hesabına qarşılanması məsələsi yenidən gündəmə gəlib. Milli Məclisin Səhiyyə komitəsinin sədri Əhliman Əmiraslanov bildirib ki, əhali arasında ən çox itkiyə səbəb olan iki patologiyadan biri onkoloji xəstəliklərdir və onların icbari tibbi sığorta ilə əhatə olunması son dərəcə vacibdir. O, həmçinin ambulator müalicə alan xəstələrin dərman təminatının sığorta hesabına qarşılanmasının vacibliyini vurğulayıb. Komitə sədrinin sözlərinə görə, bu məsələlər uzun müddətdir müzakirə olunsa da, hələ də həllini gözləyir.

Əslində, onkoloji xəstələrin müalicəsinin sığorta ilə əhatə olunması yalnız xəstəxanada göstərilən xidmətlərin ödənişinin qarşılanması demək deyil. Müalicənin mühüm hissəsi xəstə evə buraxıldıqdan sonra da davam edir. Xəstənin mütəmadi müayinələrdən keçməsi, dərman qəbul etməsi, analizlər verməsi və həkim nəzarətində qalması tələb olunur. Buna görə də ambulator müalicənin və dərman təminatının hansı həcmdə sığortaya daxil ediləcəyi xüsusi əhəmiyyət daşıyır.

Digər tərəfdən, onkoloji xəstəliklərlə mübarizədə ilkin tibbi xidmətin rolu da böyükdür. Xəstəliyin erkən mərhələdə aşkarlanması üçün bölgələrdə müasir avadanlıqlarla təchiz edilmiş tibb məntəqələrinin, ixtisaslı həkimlərin və müayinə imkanlarının olması vacibdir. Əhliman Əmiraslanov da xüsusilə regionlarda ilkin tibbi xidmətin səviyyəsinin aşağı olduğunu, kəndlərdəki tibb məntəqələrinin bir çoxunun yararsız vəziyyətdə qaldığını və kadr çatışmazlığının mövcudluğunu diqqətə çatdırıb.

Belə bir şəraitdə əsas məsələ yalnız onkoloji müalicənin sığorta paketinə daxil edilməsi deyil, xəstənin diaqnozdan müalicənin sonrakı mərhələlərinə qədər bütün zəruri tibbi xidmətlərə əlçatanlığının təmin olunmasıdır. Xüsusilə aztəminatlı ailələr üçün bu mexanizm həyati əhəmiyyət daşıya bilər. Eyni zamanda, sığorta təminatının hansı xəstəlikləri, dərmanları və müalicə üsullarını əhatə edəcəyi, xəstələrin bu xidmətlərdən necə yararlanacağı da aydın şəkildə müəyyənləşdirilməlidir.

Crossmedia.az-a açıqlamasında tibb üzrə fəlsəfə doktoru, həkim- onkoloq Fərid Museyibov bildirib ki, icbari tibbi sığorta sistemi Azərbaycanda ilk tətbiq olunanda onkoloji xəstəliklərin müalicəsi ilə bağlı bir sıra prosedurlar bu xidmətlər zərfinə daxil edilməmişdi:

“Lakin zaman keçdikcə bu istiqamətdə müəyyən dəyişikliklər edildi və ilkin müayinə xidmətləri də sığorta paketinə əlavə olundu.

Buraya müxtəlif dəqiqləşdirici müayinələr, ultrasəs müayinəsi, kolonoskopiya, qastroskopiya, kompüter tomoqrafiyası (KT), qan analizləri və maqnit-rezonans tomoqrafiyası (MRT) daxil edildi. Sonrakı mərhələdə isə onkoloji xəstəliklərin müalicəsində istifadə olunan bəzi cərrahi əməliyyatlar da icbari tibbi sığortanın əhatə dairəsinə salındı.

Onkoloji xəstəliklərin sayının artması və xəstələrin yaş baxımından getdikcə cavanlaşması bu sahədə əlavə problemlər yaradır. Apardığımız statistika da göstərir ki, hazırda Bakı şəhərində onkoloji xəstəliklər ürək-damar sistemi xəstəliklərindən sonra ilk sıralarda qərarlaşır. Eyni zamanda, bu xəstəliklərin müalicəsi kifayət qədər bahalıdır. Onkologiyada istifadə olunan dərman preparatlarının əksəriyyəti xaricdən gətirildiyindən onların qiyməti də yüksək olur. Bu isə müalicənin maliyyə yükünü daha da artırır.

Yaxın gələcəkdə kimyaterapiya, şüa terapiyası və digər cərrahi müalicə üsullarının da mərhələli şəkildə icbari tibbi sığortanın əhatə dairəsinə daxil edilməsi istiqamətində tədbirlərin davam etdirilməsi gözlənilir.

Onkoloji xəstəliklərin uşaqlar arasında da geniş yayıldığını nəzərə alsaq, bu qrup xəstələrin sığorta təminatı məsələsi xüsusi əhəmiyyət daşıyır. Görünür, uşaqların icbari tibbi sığorta çərçivəsində təminata alınması da prioritet istiqamətlərdən biridir. Çünki uşaqlarda onkoloji xəstəliklərin müalicəsi də kifayət qədər böyük maliyyə vəsaiti tələb edir və ayrılan vəsaitlər hər zaman bütün ehtiyacları qarşılamağa yetmir.

2027-ci ildə onkoloji xəstəliklərdən əziyyət çəkən şəxslərin müalicəsi üçün dövlət büdcəsindən təxminən 66 milyon manata yaxın vəsait ayrılıb”.

Məhəbbət Tərlanoğlu

Mövzular:

onkoloji xəstəliklər xərçəng icbari tibbi sığorta kimyaterapiya şüa terapiyası Fərid Museyibov Əhliman Əmiraslanov

🖨 Çap et

12:00 07.11.2026

Oxunuş sayı: 46