Paraqvayda prezident vəzifəsindən uzaqlaşdırılıb
Paraqvay Prezidenti Santyaqo Penya bank qalmaqalı fonunda impiçment yolu ilə vəzifəsindən uzaqlaşdırılıb. Ölkənin yeni prezidenti isə indiyədək vitse-prezident vəzifəsini tutan Pedro Alyana olub.
Crossmedia.az xəbər verir ki, “Reuters” agentliyi bu barədə məlumat yayıb.
Bildirilib ki, noyabrın 6-da Paraqvay Senatı Santyaqo Penyanın vəzifədən uzaqlaşdırılması barədə qərar qəbul edib. Səsvermədə iştirak edən 44 senatorun hamısı onun vəzifədən kənarlaşdırılmasını dəstəkləyib.
52 yaşlı Pedro Alyana and içərək Paraqvayın yeni prezidenti vəzifəsinin icrasına başlayıb.
2023-cü ildən vitse-prezident vəzifəsini tutan Alyana ölkəyə hazırkı prezidentlik müddətinin başa çatacağı 2028-ci ilin avqustunadək rəhbərlik edəcək.
Yeni dövlət başçısı andiçmə mərasimindən sonra çıxış edərək iqtisadi sabitliyin bərpasına və maliyyə böhranından zərər çəkən vətəndaşlara dəstək göstərilməsinə çalışacağını bildirib.
Prezident dəyişikliyinə ölkənin “Ueno Bank” maliyyə qurumunun iflası ilə bağlı qalmaqal səbəb olub.
Məlumata görə, bankda təxminən 800 milyon dollar dövlət vəsaiti yerləşdirilib. Maliyyə qurumunun fəaliyyətinin dayandırılması nəticəsində milyonlarla müştərinin hesablarına çıxışı məhdudlaşıb.
Təxminən 3 milyon müştərisi olan bankın böhranı ölkədə kütləvi etirazlara və ciddi siyasi gərginliyə səbəb olub.
Santyaqo Penyanın bankla mümkün əlaqələri, dövlət vəsaitlərinin idarə olunması və maliyyə nəzarətinin həyata keçirilməsi ilə bağlı araşdırmalar başlanıb.
Vəzifəsindən uzaqlaşdırılan keçmiş prezident ev dustaqlığına alınıb.
Penya etimaddan sui-istifadə və digər qanun pozuntuları ilə bağlı ittihamları rədd edir. Onun barəsində yekun məhkəmə hökmü çıxarılmayıb.
13:30 07.11.2026
Oxunuş sayı: 31
