ABŞ İranın nüvə proqramı haqqında məlumat verənlərə 20 milyon dollar mükafat vəd edib
ABŞ İranın nüvə proqramı ilə bağlı əhəmiyyətli məlumat təqdim edən şəxslərə 20 milyon dollaradək mükafat təklif edib.
Crossmedia.az xəbər verir ki, ABŞ Mərkəzi Komandanlığı (CENTCOM) bu barədə noyabrın 7-də “X” sosial şəbəkəsində məlumat yayıb.
Bildirilib ki, ABŞ Dövlət Departamentinin “Ədalət naminə mükafatlar” (Rewards for Justice) proqramı çərçivəsində İranın nüvə obyektləri, avadanlıqları və bu sahədə çalışan şəxslər barədə məlumatlar toplanır.
Mükafatın məbləği 20 milyon dollaradək müəyyən edilib.
Məlumata əsasən, təklif nüvə proqramı ilə əlaqəli elmi işçilər, digər mütəxəssislər, nüvə avadanlıqlarının yerləşdiyi obyektlər və onların hərəkəti barədə məlumatları da əhatə edir.
ABŞ tərəfi müvafiq məlumatları təqdim edən şəxslərin təhlükəsizliyi məqsədilə onların başqa yerə köçürülməsi imkanının da nəzərdən keçirilə biləcəyini açıqlayıb.
Bununla belə, 20 milyon dollarlıq maksimum mükafatın hansı konkret məlumatlara görə veriləcəyi açıqlanmayıb.
Qeyd edək ki, “Ədalət naminə mükafatlar” proqramı 1984-cü ildə yaradılıb. Proqram ABŞ-nin milli təhlükəsizlik maraqları ilə bağlı məlumatların əldə edilməsini nəzərdə tutur.
13:03 07.11.2026
Oxunuş sayı: 33
