Ukrayna gələn il 126 milyard dollar yardıma ehtiyac duyacaq - ŞƏRH
2024-cü ildə Ukrayna döyüş əməliyyatlarının davam etdirilməsi və infrastrukturun bərpası üçün 126 milyard dollar həcmində beynəlxalq yardıma ehtiyac duyur. The Wall Street Journal-ın məlumatına görə, bu məbləğ hərbi xərclərin ödənilməsi, müdafiə avadanlıqlarının alınması və enerji infrastrukturunun yenidən qurulması üçün tələb olunur.
Ukrayna hökuməti müharibənin davam etdiyi şəraitdə beynəlxalq tərəfdaşlardan davamlı dəstək gözləyir. Xüsusilə, ölkənin iqtisadi sabitliyinin təmin edilməsi və sosial xərclərin ödənilməsi üçün əlavə maliyyə yardımları zəruri hesab olunur. Ekspertlər bildirirlər ki, yardımların vaxtında və adekvat miqdarda təmin edilməsi Ukraynanın müharibədə davamlı müqavimət göstərməsi üçün əsas şərtdir.
Mövzu ilə bağlı Crossmedia.az-a danışan politoloq Turab Rzayev Ukraynanın xarici yardımların əsas tərəfdaşı olduğunu vurğulayıb. O qeyd edib ki, müharibədən əvvəl də Ukrayna Avropa İttifaqından daxili idarəetmə problemlərinin həlli üçün yardımlar alırdı. Müharibə dövründə isə ölkə öz resurslarını, o cümlədən xalqın təminatını əsasən Qərbdən alıb.
“Donor ölkələr sırasında Böyük Britaniya və Avropa İttifaqı ön sıralarda dayanırdı. Bununla yanaşı, Yaponiya, Avstraliya, Kanada və Koreya kimi ölkələr də yardımlar təqdim edib. Lakin əsas yardımlar Böyük Britaniya, Avropa İttifaqı və ABŞ kimi mənbələrdən gəldi. Bu yardımlar hərbi və maliyyə dəstəyi şəklində Ukraynaya çatdırılıb,” – deyə politoloq bildirib.
Turab Rzayev qeyd edib ki, Ukrayna çox vaxt istədiyi yardımları vaxtında ala bilmir. “Məsələn, Avropa İttifaqı 60 milyard avro ayırsa da, bu vəsaitin cüzi hissəsinin köçürülməsi illərlə çəkir. Bu gecikmələr ölkənin müdafiə qabiliyyətinə təsir göstərir,” – deyə o vurğulayıb.
Politoloqun sözlərinə görə, hazırda Ukrayna təkcə hərbi deyil, həm də enerji şəbəkələrinin, yolların və digər infrastrukturların bərpası üçün maliyyə yardımlarına ehtiyac duyur. O əlavə edib ki, Qərbdə Rusiyanın dondurulmuş vəsaitlərinin Ukraynaya verilməsi ideyası müzakirə olunsa da, bu vəsaitlərin əldə edilib-edilməyəcəyi hələlik qeyri-müəyyəndir.
“Ukrayna Qərbin dəstəyinə ehtiyac duyur və bu yardımlar olmadan cəbhədə zəifləməsi qaçılmazdır. Xüsusilə, Avropa İttifaqı ilə əməkdaşlıq bu prosesdə əsas rol oynayır,” – deyə Turab Rzayev bildirib.
Beynəlxalq ictimaiyyətin Ukraynaya dəstəyi 2024-cü ildə də davam edəcək. Lakin tələb olunan məbləğin təmin edilməsi üçün yeni maliyyə mexanizmlərinin tətbiqi zərurəti yaranıb.
Maral Şahverdili
09:56 03.12.2024
Oxunuş sayı: 8972
