İran Xarici İşlər Nazirliyinin sözçüsü İsmayıl Bəqayi bəyan edib ki, Tehran istənilən təcavüzə qarşı hərtərəfli və ciddi cavab vermək gücünə malikdir.
Crossmedia.az İran mediasına istinadən xəbər verir ki, bu barədə o, mətbuat konfransında çıxışı zamanı bildirib. Bəqayi qeyd edib ki, İran öz müdafiə və çəkindirmə imkanlarına tam əmindir və əvvəlki hərbi-siyasi təcrübələrini nəzərə alaraq hərəkət edir.
XİN sözçüsü beynəlxalq ictimaiyyətə də çağırış edərək vurğulayıb ki, beynəlxalq sülh və təhlükəsizliyə, eləcə də beynəlxalq hüquqa hörmət edən bütün ölkələr ABŞ-nin digər dövlətlərə qarşı səsləndirdiyi təhdidlərə münasibətdə açıq və prinsipial mövqe ortaya qoymalıdır.
“Çəkindirmə siyasəti yalnız bəyanatlarla məhdudlaşmır. İstənilən təhlükə real və praktiki cavabla qarşılanacaq”, – deyə İsmayıl Bəqayi bildirib.
Onun sözlərinə görə, İran İslam Respublikası milli təhlükəsizliyini qorumaq üçün bütün zəruri addımları atmağa hazırdır.
