Məsud Barzani: Kürdlərin varlığını təhdid edən planlara səssiz qalmayacağıq
Kürd siyasi lideri Məsud Barzani bildirib ki, əsas məqsəd siyasi həll yoluna nail olmaqdır, lakin Əyn əl-Ərəbdə kürdlərə qarşı hər hansı təhdid olacağı təqdirdə müdaxilə qaçılmaz olacaq.
Crossmedia.az bu barədə xarici mediaya istinadən xəbər verir.
Barzaninin sözlərinə görə, problemlərin mümkün qədər dinc yollarla həllinə üstünlük verilir, amma kürdlərin mövcudluğunu hədəfə alan planlar ortaya çıxarsa, buna bütün imkanlarla cavab veriləcək.
O, Rakka və Deyr əz-Zor bölgələrində vəziyyətə də toxunub. Barzani qeyd edib ki, Bəşər Əsədin tərəfində yer alan bəzi ərəb qəbilələri zaman-zaman mövqelərini dəyişiblər: əvvəl İŞİD-ə, sonra YPG-yə qoşulub, daha sonra isə onlara qarşı çıxaraq ərazilərini Dəməşq rejiminə təhvil veriblər. Barzani bu addımı YPG-yə qarşı açıq xəyanət kimi qiymətləndirib.
Onun sözlərinə görə, həmin ərazilərdə faktiki döyüş olmayıb və o, Məzlum Əbdidən kürd qüvvələrinin ərəb bölgələrindən çıxarılmasını xahiş edib. Barzani bildirib ki, ortaq dost vasitəsilə Əhməd Əş-Şaraya mesaj göndərib, daha sonra telefon danışığı baş tutub və münaqişənin kürdlərə qarşı müharibəyə çevrilməməsi barədə xəbərdarlıq edib. Onun sözlərinə görə, qarşı tərəf buna söz verib.
Barzani əlavə edib ki, bundan sonra ABŞ nümayəndəsi Tom Barrak onunla əlaqə saxlayaraq Məzlum Əbdi ilə planlaşdırılan görüşün Ərbilə köçürülməsini xahiş edib.
13:52 24.01.2026
Oxunuş sayı: 407
