Pentaqon ABŞ-nin 2026-cı il Milli Müdafiə Strategiyasını açıqlayıb. Yeni sənəddə Vaşinqtonun təhlükəsizlik prioritetlərində ciddi dəyişikliklər əksini tapıb.
Crossmedia.az bu barədə xarici mediaya istinadən xəbər verir.
Strategiyaya əsasən, Çin əsas təhlükə statusundan aşağı salınıb və diqqət ABŞ-nin daxili təhlükəsizliyinə və Qərb yarımkürəsinə yönəldilib. Qərb yarımkürəsi ABŞ üçün əsas təsir zonası elan edilib, Arktika isə əsas rəqabət məkanı kimi göstərilib. Sənəddə əvvəlki administrasiyalar Panama və Qrenlandiya kimi strateji əhəmiyyətli bölgələrdə ABŞ maraqlarını yetərincə nəzərə almamaqda tənqid edilir. Avropa isə nisbi baxımdan ikinci plana keçirilib.
Sənəddə qeyd olunur ki, Avropa hələ də vacib tərəfdaşdır, lakin onun qlobal iqtisadi gücdə payı azalır. Çin təhlükə olaraq qalır, amma artıq əsas və mərkəzi təhlükə kimi təqdim edilmir.
Yeni strategiyada ABŞ-nin əsas prioritetinin öz ərazisinin müdafiəsi və Çinin qarşısının alınması olduğu vurğulanır. Rusiya, İran və Şimali Koreya sənəddə qeyd edilsə də, mərkəzi təhlükələr kimi ön plana çıxarılmır.
Bununla yanaşı, strategiyada bildirilir ki, Şimali Koreya ilə bağlı problemlərin həllində əsas məsuliyyət Cənubi Koreyanın üzərinə düşməlidir, Rusiya ilə bağlı risklərin idarə olunması isə Avropanın öz öhdəliyi kimi qiymətləndirilir. ABŞ isə Qərb yarımkürəsində Amerika yönümlü hakimiyyətlərin hakimiyyətə gəlməsi və ya mövqelərini qoruması üçün bütün imkanlardan istifadə edəcəyini açıq şəkildə bəyan edir.
