Tramp Qrenlandiya ilə bağlı referendum ssenarisini dəyərləndirir
ABŞ Prezidenti Donald Tramp administrasiyası Qrenlandiyanın ABŞ-a birləşdirilməsi ilə bağlı referendum variantını nəzərdən keçirir. Lakin belə bir səsvermənin hüquqi qüvvə qazanması üçün Danimarka dövlətinin və parlamentinin razılığı zəruri hesab olunur.
Bu barədə crossmedia.az xarici KİV-ə istinadən xəbər verir.
Bildirilib ki, Qrenlandiya əhalisi ABŞ-a birləşmənin lehinə səs versə belə, beynəlxalq hüquqa əsasən mərkəzi hökumətin – yəni Danimarkanın razılığı olmadan bu qərar qanuni sayılmayacaq. Referendumun nəticələrinin tanınması üçün Kopenhagenin rəsmi mövqeyi həlledici rol oynayır.
Mənbələr qeyd edir ki, Qrenlandiyanın öz müqəddəratını təyinetmə hüququ mövcud olduğu kimi, Danimarkanın da bu məsələdə hüquqi səlahiyyətləri var. Bu baxımdan, Qrenlandiya ayrılma istiqamətində səs verə bilər, lakin Danimarka bu qərara qarşı çıxarsa, proses beynəlxalq səviyyədə mübahisəli hala gələ bilər.
Analitiklərin fikrincə, Danimarkanın razılığı olmadan baş verəcək hər hansı birləşmə beynəlxalq hüquq baxımından tanınmaya və “Krım 2.0” ssenarisi kimi qiymətləndirilə bilər.
22:31 14.01.2026
Oxunuş sayı: 1282
