Avropa

Yaxın vaxtlarda Fransa daxili vətəndaş müharibəsi ilə üzləşə bilər - POLİTOLOQ

Fransa öz tarixində heç vaxt yaşamadığı çətinliklərlə üzləşir. Bu dövr, siyasi və iqtisadi sahələrdəki ciddi böhranlar, daxili etirazlar və beynəlxalq təsir gücünün azalması ilə səciyyələnir. Fransa Prezidenti Emmanuel Makronun rəhbərliyi altında ölkə, inkişafdan daha çox geriləmə və çöküş mərhələsinə daxil olub. Bu vəziyyətin, yalnız daxili siyasi vəziyyətə deyil, həm də Fransa xarici siyasətinə və beynəlxalq nüfuzuna əhəmiyyətli təsirləri var. Əsasən Afrikada yaşanan itkilər və iqtisadiyyatda baş verən geriləmələr, ölkənin gələcəyini ciddi şəkildə təhdid edir.

Mövzu ilə bağlı Crossmedia.az-a açıqlama verən politoloq Elçin Xalidbəyli Fransa dövlətinin qarşılaşdığı böhranlı dönəmdən söhbət açaraq, bunun səbəb və nəticələrindən danışıb:

"Fransa hazırda öz tarixinin ən ağır dövrünü yaşayır. Bunun siyasi məsuliyyəti Makron hakimiyyəti üzərinə düşür. Çünki Makron hakimiyyəti dönəmində Fransa inkişaf prosesindən uzaqlaşaraq daha çox deqradasiya və çöküş mərhələsinə keçid edib. Bu mərhələdə Paris özünün beynəlxalq nüfuzunu ciddi şəkildə sarsıdaraq təsir gücünü önəmli səviyyədə məhdudlaşdırıb. Fransa Afrikadan qovulmaq üzrədir. O, Afrikadakı müstəmləkə bölgələrini itirməkdə davam edir. Bu isə Fransa iqtisadiyyatı üçün dəhşətli zərbə xarakteri daşıyır. Çünki Fransa iqtisadiyyatı Afrikadakı müstəmləkə ölkələrin təbii sərvətlərinin mənimsənilməsi hesabına ayaqda qalan iqtisadiyyatdır. Afrika ölkələrinin təbii sərvətlərini mənimsəmədən Fransa iqtisadiyyatının ölkənin ehtiyaclarını ödəyə biləcəyi qətiyyən inandırıcı görünmür. Bütün bunlar Makron hakimiyyətinin yürütdüyü siyasətin real nəticələridir. Fransa daxilində də Makron hakimiyyətinə qarşı inamsızlıq və etimadsızlıq durmadan artır. Ölkəni ardıcıl olaraq kütləvi etiraz dalğası bürüməkdədir. Yaxın vaxtlarda Fransa daxili vətəndaş müharibəsi, kütləvi iğtişaşlar və xaos ilə üzləşə bilər. Belə davam edəcəyi təqdirdə Makron hakimiyyətinin dəyişdirilməsi ilə bağlı olan ehtimal kifayət qədər inandırıcı görünür. Hazırda Makrona qarşı impiçment prosesinə start verilib. Belə ki, Fransa tarixində ilk dəfə olaraq Fransa parlamenti ölkə prezidentinə qarşı impiçment müracətini qəbul edib. Bu prosesin necə nəticələnəcəyi yəqin ki, yaxın vaxtlarda aydınlaşacaq".

Ekspert bütün bu uğursuzluqlarla üz-üzə qalan prezident Makronun Fransada avtoritar rejimin qurulmasına yönəlik cəhtlər göstərdiyini bildirib:

"Fransa böyük sürətlə diktatura mərhələsinə keçid etməyə doğru irəliləyir. Bunun mümkün olub-olmayacağı hələlik bəlli deyil. Əgər Makron hakimiyyəti dəyişərsə, Fransanın yenidən əvvəlki idarəçilik sisteminə dönüş imkanları artacaq. Eyni zamanda Makron hakimiyyətinin həm dünyada, həm də Fransanın daxilində mövqeylərinin zəifləməsi Cənubi Qafqazdakı proseslərə bir başa təsir göstərəcək. Çünki Makron hakimiyyəti dövründə Fransa tam ermənipərəst dövlət kimi fəaliyyət göstərib. Makron hakimiyyətinin dəyişməsi Fransanın Ermənistanla bağlı siyasətinə müəyyən dəyişikliklər edə bilər.
Fransanın Cənubi Qafqazda iqtisadi maraqları mövcuddur. Bu iqtisadi maraqlar bir mənalı şəkildə Azərbaycanla daha sıx əməkdaşlıqdan keçir. Ermənipərəst mövqe tutduqca isə rəsmi Bakı Fransa-Azərbaycan münasibətlərinin inkişafına o qədər də maraqlı deyil. Fransa istənilən halda bu məsələdə ermənipərəst mövqeyindən geri çəkilmək məcburiyyətindədir. Böyük ehtimalla bütün bunlar Makron hakimiyyətinin dəyişməsi ilə yeni perspektivlər qazana bilər".

Banuçiçək Kalbalıyeva