Hadisə

MEK-də “Könüllülük proqramı” çərçivəsində növbəti görüş keçirilib

Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) “MEK Könüllülük proqramı” çərçivəsində növbəti görüş keçirilib.

Crossmedia.az xəbər verir ki, tədbirdə çıxış edən MEK-in direktoru texnika elmləri doktoru Hüseyn Hüseynov Azərbaycanda könüllülük hərəkatının getdikcə genişləndiyini, ölkənin bir sıra sahəsində minlərlə könüllünün fəaliyyət göstərdiyini vurğulayıb. O, AMEA-nın Mərkəzi Elmi Kitabxanasında könüllülük fəaliyyətinin həyata keçirilməsini kitabxanaya, kitaba və oxuculara göstərilən yüksək diqqət kimi dəyərləndirib, eyni zamanda bu sahədə marağın artırılmasında mühüm rol oynadığını qeyd edib. Direktor MEK-in gənclərlə əməkdaşlığa xüsusi önəm verdiyini vurğulayaraq, kitabxananın müxtəlif istiqamətlərdə həyata keçirdiyi layihələr və rəqəmsallaşma prosesində onların rolundan danışıb.

Hüseyn Hüseynov qeyd edib ki, “MEK Könüllülük proqramı” artıq üçüncü dəfədir kitabxanada həyata keçirilir və bu layihə gənclərin bilik, bacarıq və təcrübələrinin inkişafına mühüm töhfə verir. Bildirib ki, proqrama 350-dən artıq müraciət daxil olub və seçim nəticəsində yalnız 25 nəfər könüllü qəbul ediləcək. O, seçim zamanı ixtisaslı kadrlar, magistrlər, doktorant və dissertantlara üstünlük veriləcəyini diqqətə çatdırıb.

Çıxışının sonunda direktor gəncləri MEK-in imkanlarından səmərəli istifadə etməyə, elmi informasiya resursları ilə işləmə bacarıqlarını təkmilləşdirməyə çağıraraq hər birinə uğurlar arzulayıb.

MEK-in elmi katibi, “MEK könüllüləri” proqramına məsul şəxs Şəbnəm Rüstəmova iştirakçılara kitabxananın strukturu, şöbələrin fəaliyyəti və könüllülərin bu prosesdə rolu barədə, həmçinin könüllülərin əldə edəcəyi əlavə imkanlar barədə məlumat verib. O, kitabxanaçılıq ixtisası üzrə müraciət edən 22 nəfərdən hər birinin ikinci mərhələyə buraxıldığını qeyd edib.

Elmi katib çıxışında bildirib ki, bu dəfə proqrama BDU, ADPU, ADNSU, ADİU, Dövlət İdarəçilik Akademiyası və digər yerli ali məktəblərlə yanaşı, Moskva, Anadolu, Atatürk və Mersin universitetlərindən olan tələbələr də müraciət ediblər. O, bunu proqramın uğurunu təsdiqləyən mühüm göstərici kimi qiymətləndirib.

O, sonuncu - müsahibə mərhələsindən də uğurla keçən gənclərin üç ay müddətində müxtəlif sosial bacarıqlar və əmək vərdişləri aşılayan təlimlərdə yaxından iştirak edəcəklərini bildirib. Şəbnəm Rüstəmova qeyd edib ki, proqram müddətində aktivliyi və təşəbbüskarlığı ilə fərqlənən könüllülərə tövsiyə məktubu və fəaliyyətlərinə uyğun sertifikatlar da təqdim olunacaq.

Ş. Rustəmova əlavə edib ki, bu mərhələ iştirakçıların bilik, bacarıq və motivasiyasını tanımaq üçündür və müsahibəyə yalnız bu mərhələdə iştirak edənlər buraxılacaq. O həmçinin bildirib ki, bu gün burada olmaq sadəcə seçim mərhələsi deyil — elm, kitab və mədəniyyət mühitinə bir addım yaxınlaşmaqdır.

Görüş zamanı Rəqəmsallaşma, innovasiya və elektron xidmətlər üzrə direktor müavini, tar.ü.f.d. Oruc Quliyev də çıxış edərək müasir dövrlə, yeni texnologiya ilə ayaqlaşan gənclərin bu proqrama qatılaraq elektron kitabxanada öz bilik və bacarıqlarını nümayiş etdirmələrini gələcək fəaliyyətlərində müsbət təsir göstərəcəyini bildirib.