Milli Kitabxanada “Əməkdar incəsənət xadimi Firudin Şuşinski -100” adlı ənənəvi kitab sərgisi açılıb
Milli Kitabxanada görkəmli musiqişünas və tədqiqatçı, Əməkdar incəsənət xadimi Firudin Şuşinskinin anadan olmasının 100 illik yubileyi münasibətilə “Əməkdar incəsənət xadimi Firudin Şuşinski -100” adlı ənənəvi kitab sərgisi açılıb.
Crossmedia.az xəbər verir ki, sərgidə Əməkdar incəsənət
xadimi Firudin Şuşinskinin əsərləri, həyatı və yaradıcılığı haqqında Azərbaycan
və xarici dillərdə çap olunmuş kitablar və dövri mətbuat materialları nümayiş
olunur.
Qeyd edək ki,
Firudin Mahmud oğlu Həsənov (Firudin Şuşinski) 1925-ci il oktyabrın 20-də
Şuşada anadan olub. İlk təhsilini Şuşada alıb, 1931-ci ildə musiqi məktəbində
skripka dərslərinə başlayıb. Pedaqoji məktəbi bitirdikdən sonra bir müddət müəllim
işləyib.
1942-ci ildə könüllü
olaraq İkinci Dünya Müharibəsinə yollanıb və döyüşlərdə fərqləndiyinə görə
“İgidliyə görə” medalı ilə təltif olunub. Müharibədən sonra Ağdamda ədəbiyyat
müəllimi kimi çalışıb. 1946-cı ildə Bakı Dövlət Universitetinin Tarix fakültəsinə
daxil olub və uğurla bitirib.
Tələbə ikən SSRI Ali
məktəb və elmi müəssisə işçiləri İttifaqının Azərbaycan Respublika Komitəsi,
Bakı şəhəri ali məktəb tələbələrinin II ümumşəhər elmi konfransında iştirak
edib. Konfransda 78 məruzə oxunub və həmin mövzular arasında yalnız Firudin
Şuşinskinin “Vaqif dövlət xadimi kimi” mövzusu 1-ci mükafata layiq görülüb. Bu
məqalə sonralar müəllifin ilk mətbu yazısı olub. Məzun olduqdan sonra Bakı məktəblərində
tarix müəllimi işləyib.
Şuşinski Azərbaycan
musiqi tarixinin tədqiqatçısı olub. İlk nəşr olunmuş məqaləsi “Vaqif və
Qarabağ” olub. 1968-ci ildə “Şuşa”, 1970-ci illərdə Cabbar Qaryağdı və Seyid
Şuşinski haqqında kitabları, 1979-cu ildə “Azərbaycanın Xalq müğənniləri və
musiqiçiləri” kitabı nəşr olunub.
1989-cu il mart
ayının 21-də Firudin Şuşinski Azərbaycan SSR “Əməkdar incəsənət xadimi” fəxri
adına layiq görülüb.
2007-ci ildə Azərbaycan
Respublikası Milli Arxiv İdarəsinin təşəbbüsü ilə Şuşinskinin topladığı
materiallar əsasında tarzən Mirzə Sadıxın həyat və yaradıcılığına həsr olunmuş
“Sadıxcan” kitabı işıq üzü görüb.
15:34 16.10.2025
Oxunuş sayı: 1512
