Almatı şəhərinin MKS-nin direktor müavini MEK-in qonağı olub
Almatı şəhərinin Mərkəzləşdirilmiş Kitabxana Sisteminin rəqəmsallaşdırma və maliyyə üzrə direktor müavini Karim Jarov Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) qonağı olub. O, kitabxananın direktoru texnika elmləri doktoru Hüseyn Hüseynovla görüşüb. Görüşdə iki ölkə arasında elmi, mədəni və informasiya sahələrində əməkdaşlıq imkanları müzakirə olunub.
Crossmedia.az xəbər verir ki, H.Hüseynov qonağa kitabxananın tarixi inkişafı, zəngin fondları, oxucular üçün yaradılan müasir şərait və son illərdə həyata keçirilən innovativ layihələr barədə məlumat verib. Direktor kitabxana xidmətlərinin rəqəmsallaşdırılması, elektron bazaların genişləndirilməsi və beynəlxalq əməkdaşlığın gücləndirilməsinin vacibliyini diqqətə çatdırıb.
K.Jarov təmsil etdiyi kitabxananın fəaliyyəti, Qazaxıstan kitabxana-informasiya işinin təşkili və tətbiq olunan yeni texnologiyalar barədə danışıb. O, qazax şairi və mütəfəkkiri Abay Kunanbayevə həsr olunmuş “Абай. Даналығы Мудрость Wisdom” adlı kitabı direktora hədiyyə edib.
Görüş zamanı kitabxananın rəqəmsallaşma, innovasiya və elektron xidmətlər üzrə direktor müavini, tar.ü.f.d. Oruc Quliyev qonağa Mərkəzi Elmi Kitabxananın fəaliyyəti ilə bağlı ətraflı məlumat verib, həmçinin xarici kitabxanalar, qurumlar ilə qarşılıqlı əməkdaşlıqdan danışıb.
Kitabxananın fəaliyyəti ilə yaxından tanış olan qonaq, öncə MEK-in Qarabağ müharibəsi qəhrəmanları fondu, buradakı guşələr, toplanan dəyərli nəşrlər haqqında ətraflı məlumat alıb. Sonra qonaq AMEA-nın təsisçilərinin büstləri, zəngin kolleksiyaların saxlandığı Akademiklər kitabxanası, eləcə də Diplomatik fondda müxtəlif ölkələrin diplomatik nümayəndəliyi tərəfindən MEK-ə hədiyyə edilən kitablardan ibarət guşə, Nadir kitablar və Xarici dillərdə ədəbiyyat fondu ilə tanış olub.
Sonda qonaq göstərilən diqqətə görə MEK rəhbərliyinə öz dərin minnətdarlığını bildirib.
10:08 15.10.2025
Oxunuş sayı: 7948
