Pavel Durov: Fransız xüsusi xidmət orqanları seçkilər öncəsi Telegram kanallarının silinməsini istəmişdi
Telegram-ın yaradıcısı Pavel Durov jurnalist Leks Fridmana müsahibəsində bildirib ki, Fransa xüsusi xidmət orqanları ondan Fransadakı işinə kömək vəd edərək Moldovadakı bəzi kanalların bağlanmasını tələb ediblər.
Crossmedia.az bildirir ki, Durovun sözlərinə görə, 2024-cü ilin payızında, Moldovada prezident seçkilərindən az əvvəl, Fransa kəşfiyyatı onun komandasına müraciət edərək bir neçə kanalın “xarici müdaxiləyə qarşı mübarizə” adı ilə silinməsini istəyib. Telegram bəzi kanalları qaydaları pozduğuna görə bağlasa da, daha sonra göndərilən onlarla kanalın siyahısını əsaslı hesab etməyərək bu tələbi yerinə yetirməyib.
Durov qeyd edib ki, bir müddət sonra xüsusi xidmət orqanlarının nümayəndələri guya həmin kanalların silinməsindən sonra onun Fransadakı işinə baxan istintaq hakiminə müraciət ediblər. Sahibkar bu yanaşmanın onu şoka saldığını və Moldovadakı seçkilərin onunla bağlı Fransadakı araşdırmaya nə aidiyyəti olduğunu anlamadığını bildirib.
Xatırladaq ki, Pavel Durov 2024-cü il avqustun 24-də Fransanın Le-Burje aeroportunda saxlanılıb. O, altı qanun pozuntusunda ittiham olunur. Məhkəmə qərarı ilə 5 milyon avro girov müqabilində azadlığa buraxılıb və məhkəmənin icazəsi olmadan Fransanı tərk etməsi qadağan edilib.
Mehriban
12:03 01.10.2025
Oxunuş sayı: 2927
