Bakı Dövlət Universitetinin (BDU) üç komandası BDU və DOST Agentliyinin “Tələbələrin təşəbbüslərinə dəstək – layihələr vernisajı” adlı yarışmasının finalına vəsiqə qazanıb.
BDU-dan Crossmedia.az-a bildirilib ki, layihə çərçivəsində ölkə universitetləri üzrə sosial sahədə rəqəmsal, innovativ və yaradıcı ideyaya sahib 43 komanda yarışıb, bu komandalardan 9-u yarışmanın final mərhələsinə vəsiqə qazanıb.
Universitetin Sosial elmlər və psixologiya fakültəsinin psixologiya ixtisasının II kurs tələbəsi Fatimə Şirəliyeva tərəfindən təqdim edilən “ÜFÜQ - Ünsiyyət, Fərqindəlik, Ümid və Qayğı” layihəsinin məqsədi ruhi sağlamlıqla bağlı çətinlik yaşayan gənclərin anonim, təhlükəsiz və rəqəmsal mühitdə öz hisslərini ifadə edə, dəstək və motivasiya ala bildikləri bir platformanın yaradılmasıdır.
Tətbiqi riyaziyyat və kibernetika fakültəsinin informasiya təhlükəsizliyi ixtisasının III kurs tələbəsi Cəmil Cəfərli tərəfindən təqdim edilən “NeuroScreen” layihəsinin məqsədi iflicli xəstələrin beyin siqnallarının oxunması və filtrlənməsi nəticəsində müxtəlif IoT əsaslı ağıllı ev texnologiyalarının, rəqəmsal vasitələrin və robot əsaslı orqanların idarəsinin təmini, xəstənin sağlamlıq vəziyyətinin ani monitorinqi və süni intellekt əsasında təyinidir.
Sosial elmlər və psixologiya fakültəsinin psixologiya ixtisasının II kurs tələbəsi Gülgün Şəfiyeva tərəfindən təqdim edilən “SƏS – Səssizlərin Səsi” layihəsinin əsas məqsədi isə süni intellekt əsaslı mobil və veb-platforma vasitəsilə eşitmə məhdudiyyətli gənclər üçün əlçatan, öyrədici və gəlir gətirən bir rəqəmsal məkanın yaradılmasıdır. Bu platforma onların yalnız məlumat əldə etməsi üçün deyil, öz bacarıqlarını cəmiyyətə təqdim etməsi və bunun vasitəsilə gəlir qazanması üçün dizayn olunub.
Yarışmanın final mərhələsinə yüksələn tələbələr öz layihələrini oktyabrın 24-də Bakıda keçiriləcək “SOCGOV 2025: Süni intellekt insan və transformasiya üçün” adlı beynəlxalq konfransda təqdim etmək imkanı qazanıblar.
